Unya miingon sila, “Dali, magbuhat kita alang kanato ug usa ka siyudad ug usa ka tore nga ang tumoy mosangko sa langit, ug magbuhat kita alang kanato ug usa ka ngalan kay tingali unya ug nagkatibulaag kita sa tibuok kalibotan.”
Ug miingon ang Ginoo, “Tan-awa, sila usa lamang ka katawhan ug may usa lamang ka pinulongan silang tanan, ug kini sinugdanan lamang sa bisan unsa nga ilang buot buhaton, ug wala unyay dili mahimo sa buot nilang buhaton.
Tungod niini ang ngalan niadtong dapita gitawag ug Babel kay didto gilibog sa Ginoo ang pinulongan sa tibuok nga yuta. Ug gikan didto gipatibulaag sila sa Ginoo ngadto sa tibuok nga yuta.
Ug nangasawa si Abram ug si Nahor. Ang ngalan sa asawa ni Abram mao si Sarai ug ang ngalan sa asawa ni Nahor mao si Milca, anak ni Haran, ang amahan ni Milca ug ni Isca.
Ug gikuha ni Tera si Abram nga iyang anak ug si Lot nga anak ni Haran, iyang apo, ug si Sarai nga iyang umagad, asawa ni Abram nga iyang anak. Ug nanglakaw sila gikan sa yuta sa Ur sa mga Caldeanhon, aron moadto sa yuta sa Canaan. Apan sa pag-abot nila sa Haran, mipuyo sila didto.