×

Ang Biblia 1982

GENESIS 16

1
Karon si Sarai, asawa ni Abram, wala magpanganak nga sa iya. Sia may ulipon nga babayi nga Egiptohanon nga ang iya ngalan si Agar;
2
kag si Sarai nagsiling kay Abram, “Yari karon, ang Ginoo nagpugung sa akon sa pagpamata; hiusa ka sa akon ulipon nga babayi; ayhan makaagum ako sing mga anak paagi sa iya.” Kag ginpamatian ni Abram ang tingug ni Sarai.
3
Gani si Sarai, asawa ni Abram, nagkuha kay Agar nga iya ulipon nga babayi nga Egiptohanon, sa tapus nga nakapuyo si Abram sing napulo ka tuig sa duta sang Canaan, kag ginhatag niya sia nga asawa kay Abram nga iya bana.
4
Kag naghiusa sia kay Agar, kag nagpanamkon sia; kag sang nakita niya nga nagpanamkon sia, gintamay niya ang iya agalon nga babayi.
5
Kag si Sarai nagsiling kay Abram, “Ang sayup nga nahimo sa akon manginsa imo! Ginhatag ko ang akon ulipon nga babayi sa imo dughan, kag sang nakita niya nga nanamkon sia, gintamay niya ako. Ang Ginoo maghukom sa tunga nimo kag nakon!”
6
Apang si Abram nagsiling kay Sarai, “Yari karon, ang imo ulipon yara sa imo kamut; himoa sa iya ang ginapakamaayo mo.” Niyan ginpintasan ni Sarai sia, kag nagpalagyo sia gikan sa atubangan niya.
7
Naabutan sia sang manugtunda sang Ginoo sa luyo sang tuburan sang tubig sa kamingawan, ang tuburan sa dalanon pa Sur.
8
Kag nagsiling sia, “Agar, ulipon ni Sarai, diin ka bala maghalin kag diin ka makadto?” Nagsiling sia, “Nagapalagyo ako gikan sa atubangan ni Sarai nga akon agalon.”
9
Nagsiling sa iya ang manugtunda sang Ginoo, “Balik ka sa imo agalon nga babayi, kag pasugut ka sa idalum sang iya mga kamut.”
10
Ang manugtunda sang Ginoo nagsiling man sa iya, “Pabuaron ko sing daku ang imo mga kaliwatan nga indi maisipan bangud sang kadamuon.”
11
Kag ang manugtunda sang Ginoo nagsiling sa iya, “Yari karon, nagadala ka, kag magaanak ka sing lalaki; hingalanan mo sia Ismael; bangud nga nabatian sang Ginoo ang imo kapipit-an.
12
Manginsubong sia sang asno nga talonon sa tunga sang mga tawo, ang iya kamut batok sa tagsa ka tawo kag ang kamut sang tagsa ka tawo batok sa iya; kag magapuyo sia batok sa tanan niyang mga utud.”
13
Gani gintawag niya ang ngalan sang Ginoo nga nagpamolong sa iya, “Ikaw amo ang Dios nga nagatan-aw”; kay nagsiling sia, “Nakakita bala ako diri sa iya nga nagatan-aw sa akon?”
14
Busa gintawag ang bobon Beer-lahai-roi; yara ini sa gin-utlan sang Cades kag Bered.
15
Kag si Agar nag-anak kay Abram sing isa ka anak nga lalaki; kag ginhingalan ni Abram ang iya anak, nga gin-anak ni Agar, Ismael.
16
Si Abram kawaloan kag anum ka tuig sang si Agar nag-anak kay Ismael nga kay Abram.
Ilonggo Bible 1982
Ang Biblia 1982 Philippine Bible Society
:
Save Notes