1
Kitom kosikyi Abram Sarai osotiondennyi lakwa; ago kitinyei chepto ne ki otwogindet, Chemisriot, ne kigiguure kainennyi Hagar,
2
ak kilenji Sarai Abram, Keero, kirata Jehovah si maii: kaigai iwe oldab chepto otwogindennyu; alen amuchi anyor lagok eng’ inendet. Ak kigas Abram kutitab Sarai.
3
Ak kingo kagomeny Abram emetab Kanan eng’ kenyisiek taman, komut anyun Sarai kwondab Abram Hagar Chemisriot otwogindennyi ak kogochi Abram manong’otiondennyi koek osotiondennyi.
4
Ak kiwa Abram ole mi Hagar, ak kimanach: ak kingogeer kole managat, kosas Hagar bounindennyi Sarai.
5
Kilenji anyun Sarai Abram, Ingobunjin nyalildanyu: kiagonin chepto otwogindennyu koek neng’ung’; ak ye kingogeer kole managat, korenya: ingobesiewech Jehovah.
6
Ago kilenji Abram Sarai, Keero, mi cheptang’ung’ euneguk; yachi ko u ye igeere ile mie. Ak kiusaus anyun Sarai inendet; kot komwee Hagar inendet.
7
Kinyorji anyun malaikaiyatab Jehovah inendet ole negite kondab beek eng’ ong’atet, noto ko kondab beek ne mitei oret ne wendi Sur.
8
Kotwekyi kolenji, Hagar, otwogindetab Sarai, ibunu ano? Ak iwendi ano? Ak kole, Kamweune bounindennyu Sarai.
9
Kolenji malaikaiyatab Jehovah, Iwekyuige bounindeng’ung’ ak iming’injige inendet.
10
Yeityo kolenji malaikaiyatab Jehovah, Abaroi mising’ iyoteng’ung’, kot koma kimuchi kiit amu chang’indo.
11
Ak kolenji malaikaiyatab Jehovah, Keero, i managat, tun isiche werit; ak iguure kainennyi Ismael, amu kogogasun Jehovah nyalildang’ung’.
12
Ak tun kergeitu inendet ak sigirietab timin eng’ kwenutab bik; mi eunekyik boriet eng’ inendet ak eng’ bik alak; ak tun meng’oti taitab bikab orenywa tugul.
13
Ak kitochi kainet Jehovah ne king’alaljin inendet, koguure, I Kamuktaindet ne keera: amu kimwa kole, Tos kaageer eng’ yu agot inendet ne keera ak kota asobe?
14
Amu noto anyun kigiguure keringonoto bo beek Beer-lahai-roi; keero, mitei kwenutab Kades ak Beret.
15
Ak kisikyi Hagar Abram werit: ak kitochi Abram werinnyi kainet koguure Ismael, ne kisich Hagar.
16
Ak ki bo Abram kenyisiek tamanwogik sisiit ak lo, ye kingosikyin Hagar Abram Ismael.
Kalenjin Bible 2020
God's word open for all Bible Society of Kenya, 2020