TUHAN pegari di mua Abraham ngimbai kayu ti besai di Mamre. Lebuh maya nya Abraham benung duduk ba penama ngagai langkau kain iya, laban hari balat amat angat.
Aku deka mega mai pemakai, ngambika kita kering majakka pejalai diri. Kita udah datai ba rumah aku, nya alai awakka aku ngintu kita tiga.” Ku sida tiga nyaut iya, “Kereja aja utai ti ku nuan.”
Udah nya iya lalu belanda ngagai raban jelu sapi lalu nangkap siku anak sapi ti gemu, lalu nyerahka jelu nya ngagai ulun iya. Ulun nya lalu beguai-guai mela jelu nya.
Iya ngambi lemak tusu, ai tusu, enggau dagin, lalu ngenahka pemakai nya di mua sida tiga. Di baruh pun kayu nya meh endur alai iya ke meri sida tiga makai, lalu sida tiga makai.
Siku ari sida tiga lalu bejaku, “Ba urung maya tu taun baru tu ila Aku deka datai baru, lalu bini nuan Sarah deka ngadaka anak lelaki siku.” Nyadi Sarah bisi ari belakang orang nya, ba mua pintu langkau kain nya, mendingka orang nya bejaku.
Nya alai Sarah ketawa dalam ati diri, ku iya, “Aku diatu nyau tuai. Baka ni ku aku agi ulih beleman enggau laki aku? Nambahka nya, laki aku pen nyau tuai.”
Kati TUHAN enda ulih ngereja sebarang utai? Munyi ti disebut Aku, semilan bulan ari diatu aku deka datai ditu baru, lalu Sarah deka ngadaka anak lelaki siku.”
Udah nya sida tiga mupuk, lalu mansang ngagai siti endur alai sida ke ulih ninjau ke baruh ngagai nengeri Sodom, lalu Abraham bejalai enggau sida, deka meda sida tiga mupuk.
Aku udah milih iya, ngambika iya ngasuh bala anak iya enggau peturun iya ngasika Aku, lalu ngereja utai ti ngena sereta lurus. Enti sida ngereja nya, nya baru Aku deka ngereja ke Abraham semua utai ti udah disemaya Aku.”
Enti sema lima puluh iku orang ke nadai penyalah bisi dalam nengeri nya, kati nuan deka ngerusak semua nengeri nya? Kati Nuan enggai ngalau nengeri nya ngambika sida ke lima puluh iku nya enda kena bunuh?
Nuan tentu enggai munuh sida ke nadai penyalah sama enggau sida ke bepenyalah. Enggai nyadi baka nya! Nuan enda tau munuh sida! Enti Nuan munuh sida, orang ke nadai penyalah deka kena ukum sama enggau sida. Enggai nyadi sekali-kali baka nya! Hakim ke ngakim semua dunya enda tau enda ngakim enggau lurus.”
Ku TUHAN nyaut, “Enti sema Aku bisi tetemuka lima puluh iku orang ke nadai penyalah di nengeri Sodom, Aku enda nyadi ngerusak nengeri nya ketegal sida.”
Tang kada enda semina empat puluh lima iku aja orang ke nadai penyalah, ukai lima puluh iku. Kati Nuan deka ngerusak semua nengeri nya, laban sida kurang lima iku?” Ku TUHAN nyaut, “Aku enggai ngerusak nengeri nya enti Aku bisi tetemuka empat puluh lima iku orang ke nadai penyalah dia.”
Abraham lalu bejaku baru, “Kada enda semina empat puluh iku aja orang ke nadai penyalah bisi dia.” Disaut TUHAN, “Aku enggai ngerusak nengeri nya enti Aku bisi tetemuka empat puluh iku aja orang ke nadai penyalah dia.”
Ku Abraham, “Anang ringat, TUHAN, tang aku enda tau enda bejaku baru. Kati enti semina tiga puluh iku aja orang ke nadai penyalah dia?” Ku TUHAN nyaut, “Aku enggai ngerusak nengeri nya enti Aku bisi tetemuka tiga puluh iku aja dia.”
Ku Abraham, “ TUHAN, ampun aku ke changka bejaku ngagai Nuan baka tu. Kati enti semina dua puluh iku aja bisi ditemu dia?” Ku TUHAN nyaut, “Aku enggai ngerusak nengeri nya enti Aku bisi tetemuka dua puluh iku aja orang ke nadai penyalah dia.”
Ku Abraham, “Anang ringat ngagai aku, TUHAN. Aku deka bejaku sekali agi. Kati enti semina sepuluh iku aja bisi ditemu dia?” Ku TUHAN nyaut, “Aku enggai ngerusak nengeri nya enti Aku bisi tetemuka sepuluh iku aja dia.”