ak kitobendo ak kigeer bik somok kotonondos ko kaitoorjigei inendet: ak ye kingogeer, kolabat eng’ kurgetab emainnyi kotorokta icheget, ak kong’uruk agoi ng’ony.
Ak kichakta Abraham kwo go ole mi Sara eng’ emait, ak kolenji, Chob kerutik somok che bo busiek che tambulul ak ichokyi si ikwanykwany ak ibeel kobwa makatinik che lebelen.
Ak kimwa inendet kole, Aweekyininge iman eng’ kenyit ne nyonei eng’ betusiechuto; ak keero, sichei kwondong’ung’ Sara werit. Ak kiebe it Sara, komi kurgetab emait, ne kimi batai.
Amu kaalewen inendet si komuch koboi lagokyik ak gonnyi che biitu let eng’ inendet, si kobiit korib oretab Jehovah, koyai ne bo iman ak kiruoget; si kobiit kosuldochi Jehovah Abraham kit ne kimwa agobo inendet.
Ingolooit eng’ inye, yaet ne u nito, ibar che bo iman koboto che yaachen, si kogergeit che bo iman ak che yaachen; ingolooit eng’ inye: tos mayaei iman Kiruogindet ne bo ng’onyuni komugul?
tos ngot ko ma biit bik mutu eng’ bik konom che bo iman: ko tos ing’em nganaset komugul amu bik mut che mami? Ak kile, Mang’eme agot anyorji bik artam ak mut.