×

Ika Bible 2018

Jẹnẹsisi 20

1
Ebraham nọ gha alị okẹnnyẹ ahụn wụ Mamre kwashi ẹgbẹrẹ atụ Nẹgẹvụ. O ru ebẹhụ, ọ nọ biri mkpamkpa Kadẹshi lẹ Shuru. Ogẹn o gi bi Gẹra nọkẹ otumunyẹ,
2
Ebraham gha e ku oku Sẹra, ọ sị “Nwẹnẹ m rọ.” Ya kẹ Abimẹlẹkị wụ eze ndị Gẹra nọ zi wẹ, wẹ nọ kpọhan'a Sẹra.
3
Kanị, Osolobuẹ nọ bịa d'e kunrun Abimẹlẹkị imẹ nrọ imẹ uhinhin, sị a, “Y'e d'a nwụnhụn makẹ ufiri okpohoni i weri, makẹni nwunyẹ ịhịan rọ.”
4
Abimẹlẹkị eke nọkunmẹ Sẹra; ya ọ nọ sị, “Osolobuẹ, n'ị tikpọ alị nwọnlẹni ihiẹn o mẹ?
5
Ẹlẹ Ebraham gi ọnụ a sị m, ‘Nwẹnẹ m rọ’? Sẹra lẹ enwẹn ẹ sịzị, ‘Nwẹnẹ m rọ?’ Onwọnkwọnị ihiẹn m bu obi mẹ ihiẹnni.”
6
Osolobuẹ nọ nọ imẹ nrọ ahụn sị a, “Ẹghẹẹ, a marịngụọ m n'o nwọnni ihiẹn i bu obi mẹ ẹ. Mmẹ gbọndọnzikwọ ị emẹlẹ m njọ; ya haịn m gilẹni n'ị mẹtụ a ẹka.
7
Wekinni nwan okẹnnyẹ ahụn nwunyẹ ẹ, makẹni onyẹ-amụma k'ọ wụ; o k'e mẹni i ekpere, y'a rị ndụn. Kanị omẹni y'e wekinn'ẹ azụụn, marịnkwọ n'i sikọ d'a nwụnhụnrịrị, yụ lẹ ndị nke i ile.”
8
Ufiri ẹ, Abimẹlẹkị nọ zọtẹnhin, kpọkikomẹ ihu ẹ ile; ọ nọ gwachanrịn wẹ ihiẹnni ile mẹni, okẹn egun nọ tụma wẹ ile.
9
Ya kẹ Abimẹlẹkị nọ kpọ Ebraham, sị a, “K'i mẹni ẹnyi ihiẹnni? Kị m mẹ i, i gi nu mmẹ lẹ ndị ile m rị a kị ye imẹ ihiẹnni ikpe gi nwan ma ẹnyi? Y'e mẹọlẹ m ihiẹn wẹ ghalẹni e mẹ ịhịan.”
10
Abimẹlẹkị nọ sị Ebraham, “K'i ro i gi mẹ ihiẹnni?”
11
Ebraham nọ sị a, “M mẹ ẹ makẹni m sị enwẹn m, ‘W'a ra tụ egun Chuku ebeni kaka akpohu; o ru tan e gi wẹ ufiri nwunyẹ m gbu m.’
12
Kanị ezioku rọ n'ọ wụ nwẹnẹ m: nwa nẹdi m rọ, kanị ẹlẹ nnẹ m mụ a, m nọ lụrụ a.
13
O mẹgụ, ogẹn Osolobuẹ gi mẹ m gha iwe nẹdi m wẹ kwahunmẹmẹ, m nọ sị a, ‘Ọhụnma ị k'a rị e mẹni m ebe ọwụlẹ ẹnyi ru wụ ọnwan, ị gha e ku oku m, y'a sị wẹ, “Nwẹnẹ m rọ.” ’ ”
14
Abimẹlẹkị nọ weri atụnrụn lẹ efin lẹ igbọn ikẹnnyẹ lẹ igbọn ikpoho ye Ebraham, yekinzikwọ a Sẹra nwunyẹ ẹ.
15
Abimẹlẹkị nọ sịzị a, “Lehunmẹ alị m ile: ebe sụọn'ị y'e biri.”
16
Ọ nọ sị Sẹra, “Lee ẹ, e yeọlẹ m nwẹnẹ i egho-ọrụn akpọhịn ọgụn-iri kwasị nnụnaị; ya k'a ghọsị ndị yụ lẹ wẹ wị nị onwọnni ihiẹn i mẹ; wẹ gi ẹ marịn nị ẹka ị rịchanrịn ọchan.”
17
Ebraham nọ nwan mẹ ekpere, kpọku Osolobuẹ, Osolobuẹ nọ zụọ Abimẹlẹkị, zụọzịkwọ nwunyẹ ẹ lẹ igbọn ẹ ikpoho, wẹ nọ mụma ụmụ —
18
makẹni Osolobuẹ te kpukinchanrịn ẹkpa-nwa ikpoho ile rị obi-eze Abimẹlẹkị makẹ ufiri Sẹra, nwunyẹ Ebraham.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes