Eka Nyasaye nowachone niya, “Kaw Isaka, wuodi ma miderma kendo mihero, mondo udhigo e piny Moria. Kuchopo kuno to chiwe ka misango e wi got moro ma abiro nyisi.”
Kuom mano Ibrahim nochiew gokinyi mang’ich. Nogawo kanje, kendo nobaro yien ma nodhi wang’ogo misango. Eka nowuok gi Isaka wuode, kod jotichne ariyo, ka gichomo kuma Nyasaye nosewachone.
Eka Isaka noluongo Ibrahim niya, “Wuora!” Mi Ibrahim nopenje ni, “En ang’o wuoda?” Isaka nowachone niya, “Wan gi mach kod yien, to ere rombo mwabiro timogo misango?”
Kane gichopo kama Nyasaye nosenyise, Ibrahim nogero kendo-mar-misango, kendo nochanoe yien. Bang’ mano notweyo wuode, moketo e wi yien ma nosechano e kendogo.
Eka malaikano nokwere ni, “Kik ineg wuodi, kata kik itimne gimoro marach, nikech koro ang’eyo ni in ng’at moluoro Nyasaye, nimar ok isetama e wuodi ma miderma.”
Akuong’ora gi nyinga awuon ni kaka ok isetama e wuodi ma miderma, abiro guedhi moloyo, mi ami nyikwayi bed mang’eny ka sulue, kendo ka kuoyo mae dho nam. Nyikwayi nolo wasikgi,