Kuv xav kom koj coglus rau kuv ntawm tus TSWV uas yog Vajtswv tus kav lub ntuj thiab lub ntiajteb hais tias, koj yuav tsis xaiv cov neeg hauv tebchaws Kana-as no tej ntxhais los rau kuv tus tub yuav ua pojniam.
Tiamsis tus tubtxib nug hais tias, “Yog hais tias tus ntxhais tsis kam nrog kuv los rau tebchaws no, kuv yuav ua li cas? Yuav cia kuv coj koj tus tub mus nyob rau tim koj lub qub teb qub chaw los?”
Yog tus ntxhais ntawd tsis kam nrog koj los, koj thiaj dim ntawm kuv tej lus cog tseg no. Tiamsis txwv tu nrho tsis pub koj coj kuv tus tub mus tid li.”
Tus tubtxib uas yog tus saib tagnrho Anplahas lub cuabtam, thiaj cab nws tus tswv kaum tus ntxhuav thauj tej khoom muaj nqis, thiab mus rau hauv lub nroog uas Nahaus nyob pem tebchaws Mexuputamias sab qaumteb.
Nws thov Vajtswv hais tias, “Tus TSWV uas yog kuv tus tswv Anplahas tus Vajtswv, thov koj pab kuv kom kuv tes haujlwm tiav hnub no, thiab ua raws li tej lus uas koj tau cog tseg rau kuv tus tswv lawm.
Nws muab lub hub dej hliv kiag rau hauv dabdej rau cov tsiaj ntawd haus tagnrho thiab rov loo mus daus dej los ntxiv dua, nws ua li ntawd rau tus tubtxib cov ntxhuav tau dej haus txhua tus li.
Nws hais tias, “Ua tus TSWV uas yog kuv tus tswv Anplahas tus Vajtswv tsaug, Vajtswv yog tus ncaj ncees thiab ua raws li nws tau coglus tseg rau kuv tus tswv lawm tiag. Tus TSWV yeej coj kuv kev ncaj nraim tuaj rau ntawm kuv tus tswv cov kwvtij.”
Lenpekas muaj ib tug nus hu ua Lanpas. Ces Lanpas txawm tawm plaws rau nraum zoov thiab khiav ncaj nraim mus rau tom lub qhovtshij uas Anplahas tus tubtxib nyob.
Lanpas hais tias, “Koj cia li nrog kuv mus tom tsev. Koj yog tus uas tau txais tus TSWV txoj koob hmoov lawm. Vim li cas koj tseem yuav sawv ntawm no ua dabtsi? Kuv twb tu tau txaj chaw rau koj so tom kuv tsev lawm, thiab nyob tod yeej muaj chaw rau koj cov ntxhuav huv tibsi.”
Xalas uas yog kuv tus tswv tus pojniam twb laus heev lawm los nws tseem yug tau ib tug tub rau kuv tus tswv thiab, mas kuv tus tswv muab tagnrho nws lub cuabtam rau tus tub ntawd.
Kuv tus tswv kom kuv coglus hais tias kuv yuav tsum mloog nws tej lus samhwm. Nws hais tias, ‘Tsis txhob mus yuav cov neeg uas nyob hauv tebchaws Kana-as no tej ntxhais los rau kuv tus tub ua pojniam hlo li.
Yog nws txaus siab muab rau kuv haus thiab nws tseem mus ce los pub rau kuv cov ntxhuav haus huv tibsi, ces thov kom nws yog tus uas koj xaiv rau kuv tus tswv tus tub yuav ua pojniam ntag.’
Nimno, yog nej zoo siab thiab ua ncaj rau kuv tus tswv, ces thov qhia rau kuv paub, yog tsis tau los thov qhia rau kuv paub, kom kuv thiaj paub txiav txim siab hais tias yuav ua li cas.”
Ces nws txawm muab tej ris tsho, tej nyiaj thiab tej saw kub los rau Lenpekas. Thiab nws tseem muab tau tej khoom pub uas muaj nqi heev rau Lenpekas tus nus thiab muab rau nws niam.
Tiamsis Lenpekas tus nus thiab nws niam teb hais tias, “Thov cia tus ntxhais nrog peb nyob xya yim hnub lossis kaum hnub ntxiv tso, nws mam nrog nej mus.”
Ces lawv txawm foom koob hmoov rau Lenpekas li no: “Tus muam, thov kom koj muaj tub muaj ki ntau txhiab ntau vam leej; thov kom koj cov xeebntxwv txeeb tau lawv cov yeebncuab tej nroog!”