Lapar pungkang sekali agi nyadi di menua nya, kelimpah ari lapar pungkang ti udah nyadi lebuh maya Abraham menya. Isak mansang ngagai Abimelek, raja orang Pilistin, ti diau di Gerar.
Diau ditu, lalu Aku deka begulai enggau nuan, lalu merekatka nuan. Aku deka meri semua menua tu ngagai nuan, enggau ngagai bala peturun nuan. Aku deka ngamatka semaya ti udah digaga Aku enggau apai nuan, Abraham.
Aku deka meri ngagai nuan mayuh peturun, ngemayuh bintang ti di langit, lalu Aku deka meri ngagai sida semua menua tu. Semua bansa deka minta Aku merekatka sida, baka Aku ti udah merekatka peturun nuan.
Lebuh orang lelaki ti diau dia nanyaka pasal bini iya, iya madahka bini iya nya menyadi iya. Isak enggai ngaku Rebekah nya bini iya, laban iya enggai ke orang munuh iya lalu ngambi Rebekah, laban Rebekah endang amat bajik.
Abimelek lalu mesanka Isak, lalu bejaku enggau iya, “Diatu baru aku nemu iya bini nuan! Nama kebuah nuan madahka iya menyadi nuan?” Ku Isak nyaut, “Laban aku ngumbai orang deka munuh aku enti aku madahka iya bini aku.”
Lalu ku Abimelek bejaku enggau Isak, “Peda nuan utai ti udah dikereja nuan ngagai kami! Enti sema siku lelaki ari bala aku bisi tekelanjur tinduk enggau bini nuan, nuan empu betanggungjawapka penyalah kami.”
Iya lalu numbak baru telaga ti udah ditumbak lebuh maya Abraham menya, tang ditambun orang Pilistin udah bekau pemati Abraham. Nama ti diberi Isak ngagai telaga nya sebaka enggau nama ti udah diberi apai iya.
Iya mindah ari endur nya, lalu numbak siti agi telaga. Sida enda belayaka telaga nya, nya alai iya ngumbai telaga nya “Bisi Endur.” Ku Isak bejaku, “Diatu TUHAN udah meri kitai endur alai diau di menua tu, lalu kitai deka nyadi kaya-raja ditu.”
Malam nya TUHAN pegari lalu bejaku enggau iya, “Aku tu Allah Taala apai nuan Abraham. Anang takut. Aku bisi enggau nuan. Aku deka merekatka nuan lalu meri ngagai nuan mayuh peturun ketegal semaya aku enggau nembiak Aku Abraham.”
Tumu pagi hari siti, genap iku sida ngaga semaya, lalu nanggam semaya nya ngena sumpah. Isak meda sida mupuk, lalu sida beserara bebaik enggau pangan diri.