Ɛn guäth ɛmɔ cu ɣɔw rɔ nyɔk kɛ mi tekɛ buɔth mi göl kä buɔth ëë ci kɔŋ tuɔɔk ni̱ni tëë te A-bɛ-ram te̱e̱kä, kä kɛ kui̱ ɛmɔ cu Ay-dhɛk cu wä cieŋ kɛɛl kɛnɛ kuäär ji̱ Pi-li-thɛt in di̱i̱t ni Ä-bi-mɛ-lɛk rɛy rɛ̈ɛ̈k in cɔal i̱ Gɛ-raar.
Bi li̱ep thi̱n kam ɔ lɛɛr ɔ, kä bä te kɛɛl kɛ ji̱, kä bi̱i̱ poth, kɛ ɣöö ɣän bä wi̱i̱ ti̱ti̱ diaal ka̱m ji̱ yɛnɛ kuayku, kä bä guk ëë cä la̱t guur ni A-bɛ-ram cu jak kä thuɔ̱k.
Mëë ci Ay-dhɛk cu jääny ɛn dhɔɔr ɛmɔ, kɛ cäŋ kɛl cu kuäär ji̱ Pi-li-thɛt in di̱i̱t ni Ä-bi-mɛ-lɛk guel kɛ wernyin kä cuɛ Ay-dhɛk nɛn lätdɛ ciekdɛ ni Rɛ-bɛ-ka kä nyin nho̱kä.
Täämɛ cu Ay-dhɛk cu puur ɛn dhɔɔr ɛmɔ kä cu kuay nyinäkɛ tëë cɛ pith rɔ̱ re̱p ni kä kuɔ̱r kä kuay diaal tëë cɛ pith kɛ jɛn ruɔ̱n ɛmɔ. Cu Kuoth Nhial ɛ cu poth inɔ.
Min cikɛ nɔmɔ liŋ, cukɛ jɛ loc i̱, “Cakɔ jɛ nɛn ɛpuc ɛn ɣöö Kuoth Nhial tëë kɛɛl kɛ ji̱. Kä cakɔ jɛ cu car ɛn ɣöö dëë gɔaa ni mi ta̱nɛ kɛ mat ruac kamädan kä bakɔ guk cu la̱th piny kɛɛl kɛ ji̱.
Kä bi rɔ yac ɛn ɣöö /ci kɔ bi luɔ̱c tɛr, ce̱tnikɛ mëë thilɛ mi jiääk mi cakɔ lät kä ji̱, ɛ ni ɣöö cakɔ lät ni ji̱ kä gɔɔy kä cuakɔ ji̱ cu jak kä wä kɛ mal. Kä nɛn ɛ, ji̱n ɛn täämɛ ci Kuoth Nhial ji̱ poth.”
Guäth ëë ci E-thɔ tekɛ run ti jiɛn ŋuaan, cuɛ kuɛɛn kɛ män da̱ŋ rɛw, kɛl ɛ Yu-dith min la nya raam kɛl kä nɛɛ Ɣɛ̈th mi cɔal i̱ Beeri, kä min dɔ̱diɛn ɛ Ba-thɛ-math nya raam kɛl kä nɛɛ Ɣɛ̈th bä, mi cɔal i̱ Ee-lon.