O zaŋm’ o ni daa niŋ alibarika shɛli niŋ Ibrahimma ni la niŋ a min’ a zuliya bɛn be a san’ ni, ka yi deei tiŋgbɔn shɛli Naawuni ni daa zaŋ ti Ibrahimma, ka yi be di ni ŋɔ su!”
Iso ni daa nya ka Yisahaku niŋ alibarika niŋ Yaakubu ni ka chɛ ka o kuli Mɛsopoteemia ni o ti kpuɣi paɣ’ nimaani maa, ka lan baŋ ni o ni daa niŋ alibarika niŋ o ni maa o daa yɛl’ o mi, “Miri ka a kpuɣi Keenan paɣa.”
ka o daa chaŋ Ishimail zuliya ni ti kpuɣi Ibrahimma bia Ishimail bipuɣiŋga ŋun yuli daa booni Mahalat ka o tizɔdoo nyɛ Nɛbaiɔt la na ti pah’ o ni daa pun mali paɣ’ shɛb’ maa zuɣu.
Ka Yawɛ daa zani baɣil’ o ka yɛli, “Mani n-nyɛ Yawɛ ŋun nyɛ a yab’ Ibrahimma mini Yisahaku Naawuni, n ni zaŋ a ni do tiŋgban’ shɛli ni ŋɔ ti a min’ a zuliya;
ka a zuliya ni ti bemi kaman bihigu la, ka yi ni yɛligi kpa wulinluhili polo mini wulimpuhili polo ni nuzaa polo ni nudirigu polo, ka dunia ŋɔ zuliya zaa ni ti nya alibarika la a min’ a zuliya maa zuɣu.
M bɔri ni a baŋ ni n ni be a sani, ka gbib’ a luɣ’ shɛlikam a ni yɛn chaŋ, ka ni ti zaŋ a labisi tiŋgbani ŋɔ ni na. Dama n kul ku chɛ a hal ti niŋ n ni lo a alikauli ni n ni niŋ a shɛm maa.”
Di saha ka Yaakubu daa po pɔri yɛli, “Naawuni yi ni be n sani, ka gbib’ ma n ni chani luɣ’ shɛli ŋɔ, ka ti ma bindirigu ka n di, ka ti ma situra ka n ye,
Ka n ni zaŋ kuɣili ŋɔ sa luɣ’ shɛli ŋɔ ni leei nyin’ Naawuni yiŋa, ka a yi ti ma binshɛlikam zaa, biɛhiŋ kani, n ni yihi di bini pia kam ni zaɣ’ yini ti a.”