Mek PAPA GƆD mek di blɛsin we i bin dɔn gi Ebraam fala yu ɛn yu gret grampikin dɛn, ɛn mek dis land we wi de so naw as trenja bi yu yon bikɔs PAPA GƆD bin dɔn gi Ebraam!”
Isɔ gɛt fɔ no se Ayzak dɔn blɛs Jekɔb ɛn sɛn am go Padan Aram fɔ go fɛn wɛf de. Ɛn we i de blɛs am i tɛl am se lɛ i nɔ mared nɔn pan dɛn Kenan gyal dɛn.
So i go fɛn in ɔnkul Ishmɛl we na Ebraam in bɔypikin, ɛn mared in gyal pikin, Maalath ɛn ad pan di wɛf dɛn we i bin dɔn gɛt. Maalath na Nɛbayɔth in sista.
PAPA GƆD insɛf bin tinap nia am ɛn tɛl am se, “Mi na PAPA GƆD, Ebraam yu grampa, ɛn Ayzak, yu papa dɛn PAPA GƆD, A go gi yu ɛn yu jɛnareshɔn dɛn dis land usay yu lidɔm so.
Yu jɛnareshɔn dɛn go bɔku lɛkɛ dɔti na grɔn ɛn dɛn go de na di ist, wɛst, nɔth ɛn sawt. Na yu ɛn yu jɛnareshɔn go mek ɔl dɛn ɔda neshɔn gɛt dɛn blɛsin.