Ha gilayon inmabot hiya hin usa nga atabay didto han kaumhan nga may tulo ka panon hin mga karnero nga nanluluob ha palibot han atabay. Ginagamit ini nga atabay hin pagpainom han mga karnero. May dako nga bato ha bawbaw han ganggang han atabay.
Kada pagtititirok didto han ngatanan nga mga panon, ginkakaliding han mga magmarangno hin mga karnero an bato ngan ginpapainom an mga karnero. Katapos, ibinabalik nira an bato.
Nagsiring hi Jacob, “Tungod nga adlaw pa man adi ngan diri pa panahon hin pagpasulod han mga panon, kay ano nga diri niyo paimnon ini ngan igbalik ngahaw ngadto han panabsaban?”
Binmaton hira, “Diri kami makakahimo hito tubtob nga aanhi na an ngatanan nga mga panon ngan kinaliding na an bato; niyan paiimnon na namon an mga panon.”
ngan han pakabati la ni Laban han sumat hiunong han iya umangkon nga lalake nga hi Jacob, dinmalagan hiya hin pagtapo ha iya, ginggakos ngan ginhadkan hiya, ngan gindara hiya ngadto han balay. Han pagsumati na ni Jacob kan Laban han ngatanan nga nahinabo,
Nagtrabaho hi Jacob hin pito ka tuig basi maasawa niya hi Raquel, nga daw sugad hin pira la ka adlaw an panahon para ha iya, kay naghigugma man hiya kan Raquel.
Dida han pagkaaga na makasabot hi Jacob nga hi Lea ngay-an an iya kadirig. Kinmadto hiya kan Laban ngan nagsiring, “Kay ano nga ginbuhat mo ini ha akon? Nagtrabaho ako hin pangasawa kan Raquel. Kay ano nga ginlimbongan mo man ako?”
Hulata ngada han katapos han usa ka semana nga pagsalin-urog han pagkasal, ngan ighahatag ko ha imo hi Raquel, kon magtrabaho ka para ha akon sulod hin lain nga pito ka tuig.”
Tinmangdo hi Jacob, ngan han katapos na han usa ka semana nga pagsalin-urog han pagkasal, iginhatag ni Laban hi Raquel nga babaye kan Jacob sugad nga iya asawa.
Nakighilawas liwat hi Jacob kan Raquel, ngan iya ginhigugma hiya labaw pa kan Lea. Ngan nagtrabaho hi Jacob para kan Laban hin lain nga pito pa ka tuig.
Nagburod hi Lea ngan nag-anak hiya hin usa nga lalake. Nagsiring hiya, “Hinkit-an han Ginoo an akon kakurian, ngan yana mahigugma na ha akon an akon bana.” Sanglit iya ginngaranan hiya nga Ruben.
Nagburod liwat hiya ngan nag-anak pa hin lalake. Nagsiring hiya, “Iginhatag liwat ha akon han Ginoo ini nga anak nga lalake kay hinbatian niya nga diri ako hinihigugma.” Sanglit iya ginngaranan hiya nga Simeon.
Nagburod na liwat hiya ngan nag-anak hin lain liwat nga lalake. Nagsiring hiya, “Yana magigin suok na gud ha akon an akon bana kay igin-anak na namon in tulo nga mga anak nga kalalaken-an.” Sanglit iya ginngaranan hiya nga Levi.
Niyan nagburod gihapon hiya ngan nag-anak pa hin lalake. Nagsiring hiya, “Yana pagdadayawon ko an Ginoo.” Sanglit iya ginngaranan hiya nga Juda. Ngan hinmunong hiya hin pag-anak.