Ka tšatši le lengwe la ge go bunwa Rubeni o tšwele a hwetša maropotlane nageng, a a tliša go Lea, go mmagwe. Rahele a kgopela Lea a re: Hlalla maropotlane a ngwana wa gago.
Lea a re: A o re ke taba e nyenyane ge o nkamogile monna wa ka? Bjale o re o nkamoge le maropotlane a ngwana wa ka! Rahele a re: A a robale le wena bošego bja lehono; wena o mphe maropotlane a ngwana wa gago.
Ka mantšiboa ge Jakobo a boa a etšwa mašemong, Lea a tšwela go mo gahlanetša, a bolela le yena a re: Tlaa go nna; ke go rekile ka maropotlane a ngwanake. Bošego bjoo Jakobo a tsena go yena.
Ke mo Lea a itšego: Modimo o mphile neo e botse; bjale monna wa ka o tlo nkgodiša, ka ge ke mmelegetše barwa ba ba selelago. Mme a mo reela leina la Sebulone (Kgodišo).
Ke go hweditše o na le mohlatswana; bjalo ke bontši bjo bogolo: Morena o go šegofaditše mo go gatilego dinao tša ka. Bjalo nna ke tlo ikagela neng ngwako wa ka?
Ge nna lehono nka sepela le dihuswane tša gago ka moka, ka kgetha dinku tšohle tše kgwana le tše tshegana le tšohle tše phifadu, le dipudi tšohle tše tshegana le tše kgwana; tšona tšeo ya ba moputso wa ka.
Mme ka moso bohlatse bja ge ke botega e tlo ba ge wena o ka tla wa bona tše e lego moputso wa ka; gomme ye o tlogo e hwetša e se e kgwana, le ge e se e tshegana, o tlo re ke e utswitše.
Ka tšatši leo a kgetha diphokwana tše mebala le tše tshega, le dipudi ka moka tše nakgwana le tše nasegana, tšohle tše di nago le bošweu, le dikwana tšohle tše di naphifadu, mme a di gafela barwa ba gagwe.
Mme Labane a re, meraka ya Jakobo e be go šele, mo motho a fihlago a sepetše matšatši a mararo. Jakobo yena a šala a diša dihuswane tše di šetšego e le tša Labane.
Tšona Jakobo a di hlaola, dikwana le diputšana; a fela a hlakanya dihuswane tšohle tša Labane le tše mebala, le tše phifadu. Ya gagwe mehlape a e kgethela go šele, a se ke a e hlakanya le dihuswane tša Labane.