O yi yɛli, ‘Bu’ shɛb’ bɛn liɣisiliɣisi ka n yɛn zaŋ yo a,’ buhi maa zaa ti dɔɣirila bubihi shɛb’ bɛn liɣisiliɣisi; ka o yi lan yɛli, ‘Bu’ shɛb’ bɛn mali bomaboma ka n yɛn zaŋ yo a,’ buhi maa zaa ti dɔɣirila bubihi shɛb’ bɛn mali bomaboma.
“Biŋkɔbiri maa tab’ dubu saha ka n daa ti zahim zahindi nya ka bulahi bɛn duri buhi maa nyɛla zaɣ’ bomaboma mini bɛn liɣisiliɣisi ni bɛn nyɛ zaɣ’ bɔribɔri.
Ka o yɛli ma, ‘Kpuɣim’ a zuɣu lihi nya bula shɛb’ zaa bɛn duri buhi ŋɔ, bɛ nyɛla zaɣ’ bomaboma mini bɛn liɣisiliɣisi ni bɛn nyɛ zaɣ’ bɔribɔri, dama n nya Leeban ni niŋd’ a shɛm.
Mani n-nyɛ Bɛtɛl Naawuni, luɣ’ shɛl’ a ni daa booi kpam bahi bimbini zuɣu ka po pɔri n san’ la. Yiɣisim’ tiŋgbɔŋ ŋɔ ni lab’ bɛ ni daa dɔɣ’ a tiŋgbɔn shɛl’ ni pumpɔŋɔ’ ”
ka taɣ’ o niɣi min’ o biŋkɔbbaligu shɛb’ zaa bɛn daa nyɛ o nyɔri m-pah’ o ni daa zali naɣ’ shɛb’ Mɛsopoteemia la zuɣu n-lu soli kuni Keenan tiŋgbɔŋ ni o ba Yisahaku sani.
Ka Leeban daa kana ti paai Yaakubu. Yaakubu daa tila o suɣa zali zoya ni, ka Leeban mi min’ o dɔɣiriba maa daa ti bɛ suɣa zali zoya ni tin’ shɛli din yuli booni Giliad la.
Amaa a yi nya a wuna maa so sani, bɛn’ kum’ o. Lihimi n nɛma ŋɔ ni nya, a bini yi be di ni, nyin’ yihim’ li ti dɔɣiriba ŋɔ zaa ninni.” Yaakubu daa bi mi ni Reechɛl n-zu n-kpuɣi wuna maa.
Ka Leeban daa kpe Yaakubu suɣili ni n-yi nimaani kpe Liya suɣili ni, ka yi nimaani kpe dabipaɣiba ayi la suɣa ni, amaa ka bi nya shɛli di ni. Ka o daa yi Liya suɣili ni chaŋ ti kpe Reechɛl suɣili ni.
Ka Reechɛl daa yɛl’ o ba, “N dana, di je suli niŋ ma n ni ku tooi yiɣisi zani a tooni maa zuɣu, dama paɣitali biɛhigu ni ka m be.” Ka Leeban daa vihi bo wuni maa ka bi nya li.
A ni vihi m binshɛɣukam zaa ni maa, a yiŋ’ bimbɔ ka a nya di ni? Zaŋm’ li zali n dɔɣiriba min’ a dɔɣiriba ŋɔ ninni, ka bɛ baŋ ti ni ŋun mali yɛlimaŋli.
N ni be a sani yuun’ pisi shɛŋa ni ŋɔ zaa, a piɛri min’ a buhi ni zaɣ’ yino gba na ʒi m-mali baɣili nti zaŋ li bahi, ka m mi na ʒi n-gbaag’ a piɛlaa kɔrigi ŋubi.
Mɔɣu ni biŋkɔbiri daa yi gbaag’ a piɛɣu, m bi zaŋd’ o na ti wuhir’ a, amaa n daa yi gbaarila mmaŋmaŋ’ piɛɣu zal’ o zaani. Bɛ daa yi zu binshɛli wuntaŋ’ ni bee yuŋ, a chɛrimi ka n yo a li.
Yuun’ pisi zaa ka m be a yiŋa. N tum tuma ti a la yuun’ pinaanahi a bipuɣins’ ayi ŋɔ zuɣu; ka gul’ a biŋkɔbiri mi yuma ayɔbu; ka a taɣi n yɔri siɣimsiɣim bupia.
Ka n yaannim’ Naawuni ŋun nyɛ Ibrahimma Naawuni ka nyɛ Yisahaku ni jɛmdi so ŋɔ yi di ka n sani, biɛhiŋ kani, a naan chɛ ka n chaŋ ni nuzaŋa. Naawuni nya n wahala mini n ni tum tuun’ shɛŋa, ka sa kpah’ a zuɣu ni yuŋ maa.”
Ka Leeban daa yɛli Yaakubu, “Bipuɣinsi ŋɔ nyɛla m bipuɣinsi, ka bihi ŋɔ nyɛ m bihi, ka biŋkɔbiri ŋɔ nyɛ m biŋkɔbiri; ka a ni nya binshɛɣukam zaa kpe ŋɔ nyɛla n dini. Amaa zuŋɔ dabisili ŋɔ wula ka n yɛn niŋ m bipuɣinsi ŋɔ mini bɛ ni dɔɣi bi’ shɛb’ ŋɔ?
Leeban daa lan yɛli, “A yi nahim m bipuɣinsi ŋɔ bee a yi kpuɣi paɣiba pahi bɛ zuɣu, ka n ʒi di yɛla, nyin’ teemi ni Naawuni n nyɛ m min’ a shɛhiralana.
Kuɣ’ duli ŋɔ mini kuɣ’ shɛli din yɛn teeri ti ŋɔ nyɛla shɛhira din wuhiri ni n ku yaɣ’ kuɣ’ duli maa zuɣu ka a sanna ti niŋ a zaɣ’ biɛɣu, ka a gba ku yaɣ’ kuɣ’ duli maa zuɣu ka n sanna ti niŋ ma zaɣ’ biɛɣu.
Ka o daa mali sara zoli zuɣu n-laɣim’ o dɔɣiriba ni bɛ kana ka bɛ min’ o ti laɣim di bindirigu, ka bɛ daa kana ka bɛ min’ o ti laɣim di bindirigu maa ka kpalim be zoli maa zuɣu yuŋ hal ka biɛɣu ti neei.