Kane Laban owachona ni diek marang’eye ema nobed pokna, to diek duto ne nywolo mana nyithindo marang’eye, kendo ka nowacho ni jamni ma kitgi rapora ema nobed pokna, to diek duto ne nywolo mana nyithindo ma kitgi rapora.
Nowachona niya, ‘Neye kaka nyuogi duto ma luwo diek gin rang’eye gi raponda kod ma kitgi okiko okiko. Mano timore nikech aseneno gik moko duto ma Laban timoni.
Kamano Jakobo noikore mondo odog ir wuon mare e piny Kanaan. Noketo nyithinde gi monde e ngamia, mi nosembo jambe duto, kendo nokawo gimoro amora ma noseyudo Mesopotamia.
To ng’ato ang’ata moyud gi nyisecheni nyaka negi! Rang gimoro amora ma mari mondo ikaw ka jowagi neno.” To Jakobo ne ok ong’eyo ni Rahel ema nosekwalo nyisechego.
Rahel nowacho ni wuon mare niya, “Wuora, kik ikech koda, ni ok anyal chung’e nyimi, nikech atuo tuo mon.” To kata Laban nodwero kamano, ne ok onyal yudogi.
Kane ondiek onego romboni moro, ne ok adewo keloni ringe ma dinyisi gima osetimore, to nachulo achula. Ne iketo chik ni nyaka achul chiayo moro amora mokwal, bed ni okwale godiechieng’ kata gotieno.
Ka dine Nyasach Ibrahim kwara mane Isaka bende lamo, ok ni koda, to dine iseriemba gi lweta nono. To Nyasaye noneno kaka natiyo matek, kendo kaka nachandora, omiyo nyoro okweri gotieno ni kik itimna gimoro marach.”
Laban nodwoko Jakobo niya, “Nyigo gin nyiga, kendo nyithindogo gin nyithinda; jamnigo bende maga. Gik moko duto ma in go gin maga. To koro datim nyiga gi nyithindgi nadi?
Laban nochako nying kanyo ni Jegar-sahadutha, to Jakobo nochake ni Galeed. (Jegar-sahadutha en dho Aram, to Galeed en dho Hibrania. Tiend nying ariyogo en pidh kite mobedo ka janeno.)