Hinbatian ni Jacob nga nagnginginurutob an mga anak nga kalalaken-an ni Laban nga nasiring, “Ginkuha ni Jacob an ngatanan nga gintag-iya han amon amay. Nagriko hiya tungod han ngatanan nga mga manggad han amon amay.”
Nagsiring hiya ha ira, “Hinkit-an ko nga diri na gud makisasangkayon ha akon an iyo tatay sugad han una; kundi nagin kaupod ko la gihapon an Dyos han akon amay.
Kada pagsisiring ni Laban, ‘An burikbutik nga mga kanding amo an imo mga suhol,’ nag-aanak hin mga burikbutik an ngatanan nga mga panon. Kon nasiring hiya, ‘An mga kabang nga mga kanding amo an imo mga suhol,’ nag-aanak hin mga kabang an ngatanan nga mga panon.
“Ha panahon han pangasta han kahayopan, nag-inop ako ngan hinkit-an ko nga mga tagiptipon, mga kabang, ngan mga burikbutik an mga lalaki nga kanding nga nangangasta.
‘Tan-awa daw,’ nagpadayon hiya, ‘mga tagiptipon, mga kabang, ngan mga burikbutik an lalaki nga mga kanding nga nangangasta. Itinugot ko ini kay hinkit-an ko an ngatanan nga binubuhat ha imo ni Laban.
Amo ako an Dyos nga pinmakita ha imo didto ha Betel diin naghalad ka hin usa nga bato sugad nga usa nga hinumdoman pinaagi hin pag-ipisi mo hin lana hin olibo ha bawbaw hini, ngan didto nagsumpa ka liwat ha akon. Yana pag-andam, ngan uli ngadto han tuna nga imo natawhan.’”
Gindudumara kami niya sugad na la hin mga lumalangyaw. Iginbaligya kami niya ngan yana nagasto na niya an ngatanan nga kwarta nga iginbayad ha iya para ha amon.
Ini ngatanan nga mga manggad nga ginkuha han Dyos tikang han amon amay, amon ini ngan han amon mga anak. Buhata an bisan ano nga iginsiring ha imo han Dyos.”
Ginpasakay niya han mga kamelyo an iya mga anak ngan an iya mga asawa, ngan ginpauna niya ha iya an ngatanan niya nga mga panon upod an ngatanan nga iya naangkon didto ha Mesopotamia.
Linmakat hi Laban hin pag-arot han iya mga karnero, ngan han waray hiya didto ha balay, kinawat ni Raquel an kadiyosan han panimalay nga gintag-iya han iya amay.
Gindara niya an ngatanan nga iya mga hiagi ngan binmaya hiya hin kadagmitan. Tinmabok hiya han Salog Eufrates ngan nagtipakadto hiya han sagkahon nga tuna han Galaad.
Igin-upod ni Laban an iya mga tawo ngan ginlanat hi Jacob sulod hin pito ka adlaw tubtob nga hin-abotan niya hi Jacob didto han sagkahon nga tuna han Galaad.
Hito nga gab-i pinmakita an Dyos kan Laban dida hin usa nga inop ngan nagsiring ha iya, “Paghinay ngan ayaw gud pagpasipad-i hi Jacob hin bisan ano nga paagi.”
Nagsiring hi Laban kan Jacob, “Kay ano nga ginlimbongan mo ako ngan gindara mo an akon mga anak nga kababayen-an sugad hin kababayen-an nga nabihag ha pag-awayan?
Kay ano nga ginlimbongan mo ako ngan binmaya ka hin waray pagpahibaro ha akon? Kon ginsumatan mo la ako, ginpapagikanan ta ikaw hin mga pagrayhak ngan pagkanta nga dinuyogan han tokar hin mga tamborin ngan mga harpa.
Kundi kon hiagian mo ha bisan hin-o ha amon dinhe nga may-ada han imo kadiyosan, maupay nga patayon hiya. Dinhe ha atubangan han aton mga tawo sugad nga mga saksi, pamilnga in bisan ano nga imo gintatag-iya ngan kuhaa an imo.” Waray makasabot hi Jacob nga ginkawat ngay-an ni Raquel an kadiyosan ni Laban.
Sinmulod hi Laban ngan gin-usisa niya an sakob han tulda ni Jacob. Katapos sinmulod hiya han tulda ni Lea ngan han tulda han duha nga mga oripon nga kababayen-an, kundi waray niya hiagii an iya kadiyosan. Niyan sinmulod hiya han tulda ni Raquel.
Ginkuha ni Raquel an kadiyosan han panimalay ngan iginbutang ini dida han supot han muntora han kamelyo, ngan iya ini ginlingkoran. Gin-usisa ni Laban an bug-os nga tulda, kundi waray hiya makaagi.
Nagsiring hi Raquel kan iya tatay, “Ayaw ako kasinahi, itay, kay diri ako makakahimo hin pagtindog ha imo atubangan kay rinirigla ako.” Nagpinamiling hi Laban, kundi waray gud niya makaagi han iya kadiyosan.
Niyan waray na makapugong hi Jacob han iya kapungot. Ha iya kasina nagpakiana hiya, “Ano nga sayop an akon nabuhat? Ano nga balaod an akon natalapas nga nakahatag ha iyo hin katungod hin paglanat ha akon?
Yana nga gin-usisa mo na an ngatanan nga akon mga kasangkapan, ano nga butang hin panimalay an imo hin-agian nga imo gintatag-iya? Igawas ito ngadi basi hikit-an han imo ngan han akon mga tawo, ngan papagbut-a hira kon hin-o ha aton an matadong.
Kaupod ako nimo sulod hin 20 na ka tuig; waray umundang hin pag-anak an imo mga karnero ngan an imo mga kanding, ngan waray ako kumaon hin bisan usa nga karnero nga lalaki tikang han imo mga panon.
Kada pagpapataya hin ihalas nga kamanampan in usa nga karnero, akon dayon gin-aangkon an kapirdehan. Waray ako magdara hini ngadto ha imo hin pagpakita nga diri ini sayop nakon. Nagkinahanglan ka gud nga akon pagbaydan an bisan ano nga nakawat ha adlaw o ha gab-i.
Amo ito an akon kahimtang sulod han 20 ka tuig nga upod ako ha imo. Nagkabudlay ako hin 14 ka tuig para han duha mo nga mga anak nga kababayen-an ngan unom ka tuig para han imo mga panon. Ngan bisan pa ngani, imo ginliwatliwat hin makanapulo an akon mga suhol.
Kon diri pa upod ha akon an Dyos han akon mga ginikanan, nga Dyos nira Abraham ug Isaac, imo na unta ako ginpaiwas nga waray dara. Kundi hinkit-an han Dyos an akon kakurian ngan an buruhaton nga akon gintuman, ngan kagab-i iginhatag niya an iya paghukom.”
Binmaton hi Laban kan Jacob, “Mga anak ko ini nga mga babaye; akon man an ira mga anak ngan akon ini nga mga panon. Ha pagkatinuod, akon an ngatanan nga imo hinkikit-an dinhe. Kundi tungod nga waray ko man mahihimo hin paghawid han akon mga anak nga kababayen-an ngan han ira mga anak,
Nagsiring hi Laban kan Jacob, “Magigin usa nga saksi ini nga tinambak nga mga bato para ha aton nga duha.” Amo ini nga ginngaranan nga Galeed ito nga dapit.
Nagpadayon hi Laban, “Kon diri mo upayon hin padara an akon mga anak nga kababayen-an, o kon mangasawa ka hin iba nga kababayen-an, bisan kon diri ko ini hibaroan, panumdom nga sayod ha aton an Dyos.
Mga pahanumdom nga duha ini nga tambak ngan ini nga bato nga hinumdoman. Diri gud ako matabok hini nga tambak hin pagsulong ha imo, ngan kinahanglan diri ka man tumabok hini o hini nga bato nga hinumdoman hin pagsulong ha akon.
Maghuhukom ha aton an Dyos ni Abraham ngan an Dyos ni Nahor.” Niyan nagsumpa hi Jacob hin pagtuman hini nga saad ha ngaran han Dyos nga ginsingba ni Isaac nga iya amay.
Nag-ihaw hiya hin usa nga mananap nga iya iginhalad nga halad nga tinubod didto han bukid, ngan gindapit niya an iya mga tawo ngadto han pangaon. Katapos nira mangaon, didto hira han bukid pagpalabay han gab-i.