Ya re ge Jakobo a lebelela a iša mahlo kua pele, a bona go fihla Esau a na le banna ba makgolo a mane. Jakobo a napa a arola bana ba gagwe, a ba gafela Lea, a ba gafela Rahele le balata bala ba bona.
Esau ge a lebaleba a bona basadi le bana bao, mme a re: Ke bomang ba o nago le bona? Jakobo a re: Ke bona bana bao Modimo a šegofaditšego nna mohlanka wa gago ka bona.
Jakobo a re: Aowa hle! Ge ke hweditše mahlo a gago a ntebeletše ka botho, gona amogela neo ya ka e tšwago seatleng sa ka. Hleng sefahlogo sa gago, ge ke se bona, e bile eke ke bona sefahlogo sa Modimo ge o nthabela.
Jakobo a re: Mongaka o a bona, bana e sa le dirathane, mme ke na le dihuswane le dikgomo tše di amušago; ge di ka gobagobišwa letšatši letee, diruiwa ka moka di ka hwa.
A mong wa ka a ete mohlanka wa gagwe pele; nna ke tlo sepela ka go nokologa ke bona maoto a diruiwa tše ke di gapago, le maoto a bana mo a fihlago; gomme ke tlo ba ka fihla Seire go wena mong wa ka.
Esau a re: A nke ke go šadišetše ba bangwe ba banna ba ba ke nago le bona. Jakobo a re: E tlo ba ba go dirang? A nke re hwetše mong wa ka a ntebeletše ka botho.
Jakobo yena a tsoga a ya Sukothe, a ikagela ntlo; diruiwa tša gagwe o di diretše maobo; ke ka baka leo felo fao ba go reetšego ba re ke Sukothe (Maobong).