×

Ñanderuete Ñe’ẽ Porã 2015

35

1
Ñanderuete he’i Jacóbope: Epu’ã ha ejupi Betélpe, ha epyta upépe emopu’ã peteĩ kuave’ẽmby renda, Che ajehechauka haguére ndéve, rekañy ramoguare nde ryke’y Esaúgui.
2
Upéramo Jacóbo he’i hogayguakuérape ha mayma hendive oĩvape: Peipe’apa umi jára gua’u oĩva guive pende apytépe, peñemopotĩ ha pemonde ao potĩ.
3
Ha ñapu’ã joaite, jajupi hag̃ua Betélpe; ha upépe ajapóta peteĩ kuave’ẽmby renda Ñanderuetépe g̃uarã chepytyvõ porã haguére che angekõiha árape, ha chemoirũva’ekue pe tape aiko haguérupi.
4
Upéicha ome’ẽmba hikuái Jacóbope ijára gua’ukuéra, ha inamichãinguéra, ha Jacóbo oñotỹmba umía peteĩ encína yvyra guýpe, opytáva Siquem yvýpe.
5
Upéi osẽ hikuái, ha peteĩ kyhyjeguasu Ñanderuetégui ho’a umi táva ha ijerére oĩva, upévagui avave nomuñái Jacóbo ra’ykuérape.
6
Ha Jacóbo hogayguakuéra ndive og̃uahẽ Lúzpe, (péva hína Betel), opytáva Canaan retãme.
7
Ha upépe omopu’ã ambue kuave’ẽmby renda ha ombohéra pe yvy péva Betel, Ñanderuete ojehechauka haguére ichupe okañy ramoguare ityke’ýragui.
8
Upépe omano Débora, Rebéca mongakuaahare, ha oñeñotỹ ichupe peteĩ yvyra encína guýpe, Betel ypýpe, ha pe yvy péva oñembohéra Alon-bacut.
9
Ha Ñanderuete ojehechauka jevy Jacóbope, osẽ rire Padan-arámgui, ha ohovasa ichupe.
10
Ha he’i ichupe: Nde réra Jacóbo; ko’ág̃a katu nandereramo’ãvéima Jacóbo, nderérata Israel; ha upéguive ombohéra ichupe Israel.
11
He’i avei ichupe: Che ningo pe Jára ipu’akapáva; eñemoña ha eñembohetavéke, tetã ha tríbu atýra osẽ hag̃ua ndehegui, ha heta tetã ruvicha osẽta ndehegui.
12
Kóva ningo pe yvy aprometeva’ekue Abraham ha Isaácpe, ndéve ha nde rireguápe ame’ẽta ko yvy kóva.
13
Upéi Ñanderuete oho ijypýgui, pe tenda oñe’ẽ haguégui hendive.
14
Ha Jacóbo omopu’ã peteĩ itaguasu, techaukaha ramo, Ñanderuete oñe’ẽ haguépe hendive, ha hi’ári oñohẽ víno ha acéite.
15
Ha Jacóbo ombohéra pe yvy péva Betel, he’iséva Ñanderuete róga.
16
Upéi oho hikuái Betélgui, ha og̃uahẽ mboyve Efrátape, Raquel hasyete imemby hag̃uáicha.
17
Ha hasýma ramo imemby hag̃uáicha, ipartéra he’i ichupe: Ani rekyhyje, ko ne memby, kuimba’e jevýta.
18
Ha ojehu ningo ojehekýivo Raquel hi’ánga omanonguévo ombohéra imembýpe Benoni, itúva katu ombohéra ichupe Benjamin.
19
Upéicha omano Raquel, ha oñeñotỹ ichupe Efráta rapépe, péva hína Belen.
20
Upéi Jacóbo omopu’ã peteĩ itaguasu isepultúra ári, péva hína Raquel tyvy techaukaha ko ára peve.
21
Israel osẽ ha omopu’ã hóga mymba pirekueguigua, Migdal-edérgui amo gotýove.
22
Ha ojehu ningo Israel (Jacóbo) oiko aja pe tetãme, Ruben oñeno itúva kuña Bílha ndive; ha pe mba’e ojekaauka Israélpe. Israel ra’ykuéra ningo 12.
23
Ko’ãva Léa memby: Ruben, Jacóbo ra’y ypykue, Simeon, Levi, Juda, Isacar ha Zabulon.
24
Raquel membykuéra: Jose ha Benjamin.
25
Bílha membykuéra (Raquel rembiguái): Dan ha Neftali.
26
Zilpa membykuéra (Léa rembiguái): Gad ha Aser. Ko’ãva hína Jacóbo ra’ykuéra onaceva’ekue Padan-arámpe.
27
Upéi Jacóbo og̃uahẽ itúva Isaac rendápe, opytáva Mámre, Arba távape, péva hína Hebron, Abraham oiko haguépe avei,
28
upéramo Isaac oguerekóma 180 áño.
29
Isaácgui ojehekýi ipytu ha omano, ha oñembyaty ijypykuéra ndive, ituja ha henyhẽ ára hetágui, ita’yrakuéra Jacóbo ha Esau oñotỹ ichupe.
Guarani Bible 2015
Ñanderuete Ñe’ẽ Porã MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015
:
Guardar notas