Udah nya Esau lalu mai sida bini iya, enggau bala anak lelaki iya, bala anak indu iya, enggau semua orang ke diau dalam rumah iya, sereta enggau semua raban jelu tupi iya enggau semua reta tengkira ti udah ulih iya di menua Kanaan, angkat ninggalka menyadi iya Jakop, lalu mindah jauh ngagai menua bukai.
Bini Esau ke benama Adah ngadaka siku anak lelaki, Elipas, lalu Elipas bisi lima iku anak lelaki: Teman, Omar, Sepo, Gatam, enggau Kenas. Ari bini iya ke benama Timna, Esau bisi siku agi anak lelaki, ke benama Amalek. Bini Esau ke benama Basemat ngadaka anak lelaki siku, Reuel, lalu Reuel bisi empat iku anak lelaki: Nahat, Serah, Samah, enggau Misah.
Orang ke dulu nguan menua Edom, dibagi ngagai berapa bengkah suku raban bansa. Sida tu peturun Edom, orang Hori. Raban bansa nya nyengkaum raban peturun Lotan, Sobal, Sibeon, Anah, Dison, Eser, enggau Disan.
Sibeon bisi dua iku anak lelaki, Aiah seduai Anah. (Anah tu orang ke tetemuka mata ai ti angat di menua puang lebuh iya ngibun raban keledai apai iya.)
Sebedau menua Israel bisi raja, tu nama sida raja ke betangkan-tangkan megai perintah di menua Edom: Bela, anak lelaki Beor, ari Dinhabah Jobap, anak lelaki Serah, ari Bosrah Husam ari menua Teman Hadat, anak lelaki Bedat ari Abit (iya udah ngalahka orang Midian ba siti perang ti nyadi di menua Moap) Samlah, ari Masrekah Saul, ari Rihobot-ti-ba-Sungai Baal Hanan, anak lelaki Akbor Hadat, ari Pau (bini iya Mehetabel, anak indu Matret, uchu Mesahap)
Esau nurunka suku raban bansa: Timna, Albah, Jetet, Oholibamah, Elah, Pinon, Kenas, Teman, Mipsar, Makdil, enggau Iram. Menua ti diuan siti-siti suku raban bansa tu ngangkatka nama suku raban bansa nya empu.