Ditaba tša Jakobo šedi: Josefa mola e sa le lesogana la nywaga e lesome le metšo e šupago, o be a diša dihuswane a na le bana babo; gomme e be e le yena e monyane ge a na le barwa ba Biliha le Silipa basadi ba tatagwe. Gomme Josefa o be a fela a sebela tatagwe tše mpe tše ba bolelwago ka tšona.
Isiraele yena o be a hlaola Josefa ka go mo rata mo go bana ba gagwe ka moka, ka gobane o belegwe tatagwe a šetse a tšofetše, mme o mo diretše seaparo sa mebala.
Ke mo bana babo ba itšego: Afa o rata go ba kgoši ya rena, wa re buša! Ka baka la diloro tše, le ka baka la dipolelo tše, lehloyo la bona la fela le gola.
Ya re ge a di anegela tatagwe le bana babo tatagwe a mo kgala, a re: Ke diloro mang tše o di lorago? Afa o re nna le bana beno re ka tla ra khunama ra go lotšha?
Isiraele a re: Sepela hle, o bone ge bana beno ba sa thabile, le dihuswane di sa thabile; mme o boe o ntlele le madireng. O mo romile a le moeding wa Heburone; mme a ya Sikeme.
Rubeni a buša a re: Le se ke la thula madi; mo lahleleng moleteng wola wa kua lešokeng; le se ke la mo iša seatla. A realo gore a mo namolele, a kgone go mmušetša go tatagwe.
Bjale ge ba dutše ba eja bogobe, ba bona kua kgole go etla baeti ba Baisimaele ba ba tšwago Gileada. Dikamela tša bona di be di rwele boroku, le dihlare, le ditlolo; ba swere tsela ba di iša Egipita.
Bjale ge banna bao ba Midiane ba babapatši ba feta, ba goga Josefa ba mo ntšha moleteng, ba mo rekiša ka mašeleng a masome a mabedi go Baisimaele. Bona ba mo iša Egipita.
Barwa ba gagwe ka moka le barwedi ba gagwe ka moka ba leka go mo homotša; yena a gana go homotšwa a re: Aowa, ke tlo fologela kua bodulabahu go morwa wa ka ke lla. Tatagwe a mo llela a realo.