1
Ekaba ase engaki eria Yuda agatiga abamwabo, agatirimboka, agaika ase omonto gete Omoadulamu ore korokwa Hira, bakabwatana nere.
2
Aroro Yuda akarora Batisua, omoiseke bw’Omokanani gete, akamonyuoma. Bakaba bakorara amo,
3
na Batisua akaba morito, akaibora omwana omoisia, akamoroka Eri.
4
Naende akaba morito, akaibora omwana omoisia, akamoroka Onani.
5
Akaba morito naende, akaibora omwana omoisia, akamoroka Sela. Yuda nere nao arenge aria Kisibo ekero amoiborete.
6
Na Yuda akanyuomeria Eri, omwana oye omotangi, omokungu ore korokwa Tamari.
7
Nere Eri, omomura omotangi o Yuda, nigo arenge omobe ase obosio bw’Omonene; ase ayio Omonene akamoita.
8
Erio Yuda agatebia Onani, “Motware moka momura omino, erinde omotenenerie egesaku.”
9
Korende Onani akamanya ng’a abana abwo agochia koibora tibari gochia korokwa abaye. Akaba ekero are koba na moka momura omwabo, oroiboro korwachire, arorusia aitera inse, ng’a tabaisa goteneneria oyomwabo egesaku.
10
Ayio akorete akaba amabe ase obosio bw’Omonene, nere Omonene akamoita.
11
Erio Yuda agatebia Tamari, moka momura oye, “Genda omenye buna omoboraka ase omochie o iso goika Sela omwana one akine”; naki nigo oboete ng’a nere nabaise gocha gokwa, buna abamwabo bakwete. Ase igo Tamari akagenda akamenya o ise.
12
Amatuko amange gaetire Batisua, moka Yuda, agakwa; Yuda gakoorire okomoreera, agatiira gochia Timuna ase abanachi amarionya be ching’ondi chiaye, amo nomosani oye Hira Omoadulamu.
13
Ekero Tamari atebetigwe ng’a ise biara nkogenda akare Timuna konacha ching’ondi chiaye amarionya,
14
akarusia chianga chiaye chi’ogokobania, akeboyia chianga na gwetuba obosio bwaye, agaikaransa geita ki’Enaimu, ang’e nenchera ekogenda Timuna; naki nigo aroche ng’a Sela obeire omonto omonene, na tamoeiri amotware.
15
Ekero Yuda amoroche, agakaga ng’a nomokungu omotayayi, ekiagera nigo atubete obosio bwaye.
16
Yuda akagobera gochia asare enchera ensemo, akamotebia, “Inyanchere insoe asore,” naki tamanyete gose moka momura oye orenge. Tamari akamoboria, “Inki orang’e, erinde osoe asende?”
17
Akamoiraneria, “Ninchie kogotomera emanwa egoree korwa ase riicho riane.” Omokungu oria akamoboria, “Inee! Inki orang’e kebe intenenera goika kwayentomeire?”
18
Akamoboria, “Ngento ki origetie nkoe kebe intenenera?” Akamoiraneria, “Ebonyi yao ere nekemanyererio, na orokini rwao, na enyimbo yao obwate koboko.” Erio akamobia, akarara nere, na ere akaba morito.
19
Erio akaimoka akagenda, akarusia egietubo, akabeka chianga chiaye chi’ogokobania.
20
Yuda akaa omosani oye Omoadulamu emanwa egoree airere omokungu oria, erinde ere airanie ebinto biria amoete bibe intenenera, korende tamonyora.
21
Omoadulamu oria akaboria abanto b’aase aria, “Ng’ai are omokungu oria omotayayi, oyorenge aa Enaimu enchera ensemo?” Bakamokania, “Omokungu omotayayi tana koba aa.”
22
Ase igo akairana gochia ase Yuda, akamotebia, “Timonyoreti; naboigo nonya nabanto b’aase aria nigo bankania ng’a mokungu omotayayi tana kobao.”
23
Yuda akabora, “Tiga atware ebinto ebio namoete bibe intenenera, titobaisa gocha kororekana nobosooku. Rora, namotomerete emanwa egoree, na aye tikwamonyorete.”
24
Ekaba nyuma y’emetienyi etato Yuda agatebigwa ng’a Tamari, moka momura oye, okorire obotomani bw’obotayayi; amo nayio morito are ase obotayayi. Erio Yuda akabora, “Mosokie isiko, asambwe nomorero.”
25
Gasokigwe isiko agatoma abanto ase ise biara, bamotebie, “Omonto omonyene ebinto ebi, nere ong’ete oborito obo.” Naende akabora, “Manya ebonyi eyio ere nekemanyererio, na orokini oro, na enyimbo eye, gose nebia ng’o.”
26
Erio Yuda akabimanya, akabora, “Ere nomoronge kombua, nigo akora ayio, ekiagera ntamoete Sela, omwana one, amotware.”
27
Ekero engaki yaye y’okoibora yachia goika, akarorekana ore ne chibarongo enda yaye ime.
28
Ekero arenge koibora, omwana oyomo agatang’ania okoboko isiko, na omoiboria akamosibera okoboko okwo eusi embariri, agateba, “Oyo nere otanga gosoka isiko.”
29
Kairanirie okoboko kwaye, rora, oyomwabo akaromeng’ana, agasoka isiko. Erio omoiboria agateba, “Naki okoromeng’ana ne chinguru iga?” Ase ayio bakamoroka Peresi.
30
Nyuma yaye oyomwabo agasoka ore neusi embariri koboko kwaye. Nere akarokwa Zera.
Gussi Bible 2020
OLD EKEGUSII BIBLE PROTESTANT EDITION Bible Society of Kenya, 2020