|
| 1 |
|
| Iok-sek hō͘ lâng tòa lo̍h-khì Ai-ki̍p; ū chi̍t ê Ai-ki̍p -lâng, chiū-sī Hoat-ló ê jîn-sîn sī-ōe-tiúⁿ Pho-thê-hoa̍t, tùi hiah-ê Í-si̍t-má-lī -lâng chiong Iok-sek bóe--khì. |
|
| 2 |
|
| Siōng Chú kap Iok-sek tông-chāi, hō͘ i sū-sū sūn-lī; i tòa tī chú-lâng Ai-ki̍p -lâng Pho-thê-hoa̍t in tau. |
|
| 3 |
|
| I ê chú-lâng khòaⁿ-kìⁿ Siōng Chú kap Iok-sek tông-chāi, koh Siōng Chú hō͘ Iok-sek só͘ chòe ê sū lóng sūn-lī, |
|
| 4 |
|
| chiū kah-ì Iok-sek, hō͘ Iok-sek tī seng-khu piⁿ ho̍k-sāi. Chú-lâng phài Iok-sek koán-lí i ê ke, chiong só͘-ū--ê lóng siū-koân hō͘ i. |
|
| 5 |
|
| Tùi hit-sî khai-sí, Siōng Chú in-ūi Iok-sek ê iân-kò͘, sù-hok hō͘ hit-ê Ai-ki̍p -lâng ê ke; Siōng Chú chiok-hok hit-ê Ai-ki̍p -lâng ê ka-têng kap chhân-hn̂g só͘-ū--ê. |
|
| 6 |
|
| Hit-ê Ai-ki̍p -lâng chiong i it-chhè só͘ ū--ê lóng siū-koân hō͘ Iok-sek; i só͘ chia̍h ê mi̍h í-gōa, i lóng bô teh koán. Iok-sek siⁿ-chòe iân-tâu thé-keh hó. |
|
| 7 |
|
| Chiah-ê tāi-chì í-āu, Iok-sek ê lú-chú-lâng kā i sái-ba̍k-bé, tùi i kóng, “Lâi kap góa khùn.” |
|
| 8 |
|
| Iok-sek m̄-khéng, tùi i ê lú-chú-lâng kóng, “Lí chai, chú-lâng í-keng chiong i só͘-ū--ê kau-tài góa; ū góa tī chia, chú-lâng chiū lóng m̄-bián chhau-hoân. |
|
| 9 |
|
| Tī chit-ê ke, bô lâng pí góa khah tōa; lí í-gōa, i bô chi̍t hāng bô kau hō͘ góa, in-ūi lí sī i ê bó͘. Án-ni, góa ná thang chòe chit-khoán ke̍k-pháiⁿ ê sū tek-chōe Siōng-tè?” |
|
| 10 |
|
| Lú-chú-lâng sui-jiân ta̍k-ji̍t án-ni kā Iok-sek ín-iú, m̄-kú Iok-sek m̄-khéng thiaⁿ i ê ōe, lóng bô kap i chòe-hé khùn, mā bô beh kap i chòe-hé. |
|
| 11 |
|
| Ū chi̍t ji̍t, Iok-sek ji̍p-khì chhù-lāi pān tāi-chì; chhù-lāi lóng bô lâng. |
|
| 12 |
|
| Lú-chú-lâng khiú i ê saⁿ, kóng, “Lí lâi kap góa khùn.” Iok-sek chiong saⁿ pàng tī i ê chhiú, cháu chhut-khì gōa-bīn. |
|
| 13 |
|
| Lú-chú-lâng khòaⁿ-tio̍h Iok-sek chiong saⁿ pàng hō͘ i, koh cháu chhut-khì gōa-bīn, |
|
| 14 |
|
| chiū kiò ke-lāi ê lâng lâi, kā in kóng, “Lín khòaⁿ leh, chú-lâng kā chi̍t ê Hi-pek-lâi -lâng chhōa ji̍p-lâi lán chhù-lāi hì-lāng lán; i lâi góa chia, beh kap góa khùn, góa chiū tōa-siaⁿ hoah. |
|
| 15 |
|
| I thiaⁿ-tio̍h góa chhut-siaⁿ hoah, chiū chiong i ê saⁿ pàng tī góa chia, cháu chhut-khì gōa-bīn.” |
|
| 16 |
|
| Hū-jîn-lâng chiong Iok-sek ê saⁿ siu tī i hia, thèng-hāu Iok-sek ê chú-lâng tò--lâi. |
|
| 17 |
|
| I tùi i ê tiōng-hu kóng chiah-ê tāi-chì, kóng, “Lí tòa-lâi lán chia hit-ê Hi-pek-lâi lô͘-lē ji̍p-lâi góa chia, beh hì-lāng góa; |
|
| 18 |
|
| góa chi̍t-ē tōa-siaⁿ hoah, i chiū chiong i ê saⁿ pàng tī góa chia, cháu chhut-khì gōa-bīn.” |
|
| 19 |
|
| Iok-sek ê chú-lâng thiaⁿ-tio̍h i ê bó͘ tùi i kóng “Lí ê lô͘-lē án-ni án-ni tùi-thāi góa”, chiū hui-siông siū-khì. |
|
| 20 |
|
| Iok-sek ê chú-lâng chiong i koaiⁿ tī teh koaiⁿ ông ê hoān-lâng ê kaⁿ-ga̍k. Tùi án-ni, Iok-sek chiū tī hia chē-kaⁿ. |
|
| 21 |
|
| M̄-kú Siōng Chú kap Iok-sek tông-chāi, si-un hō͘ i, hō͘ kaⁿ-ga̍k-tiúⁿ kah-ì i. |
|
| 22 |
|
| Kaⁿ-ga̍k-tiúⁿ chiū chiong kaⁿ-ga̍k lāi-bīn ê hoān-lâng lóng kau hō͘ Iok-sek koán-lí; kaⁿ-ga̍k lāi-bīn só͘-ū ê tāi-chì, lóng sī i teh chhú-lí. |
|
| 23 |
|
| Só͘-ū kau hō͘ Iok-sek pān-lí ê tāi-chì, kaⁿ-ga̍k-tiúⁿ oân-choân sìn-jīm, in-ūi Siōng Chú kap Iok-sek tông-chāi, hō͘ i sū-sū sūn-lī. |
|
|
|
|