1
Bono Yusufu agatirimbokigwa gochia Misiri; na Potifari, omoteneneri bw’enka ya Farao na omotang’ani bw’abarendi baye bande, omonto o Misiri, akamogora korwa ase Abaisumaeli, abwo bamotirimbogetie gochia aroro.
2
Omonene nigo arenge amo na Yusufu, na ere akanyora ogosesenigwa. Yusufu akamenya ase enka y’omonene oye, oria Omomisiri.
3
Ere nigo aroche ng’a Omonene nigo arenge amo na Yusufu, ogerire ebinto bionsi biasesenigwe ase amaboko aye.
4
Ase igo Yusufu akanyora ogwancherwa ase obosio bw’omonene oye ng’a amokorere; na ere akamobeka abe omoteneneri bw’enka yaye yonsi, na omorigereria bw’ebinto bionsi ebi abwate.
5
Korwa engaki eyio amobegete abe omoteneneri igoro y’enka yaye, na bionsi ebi abwate. Omonene agasesenia Omomisiri oria ase engencho ya Yusufu, na ogosesenia kw’Omonene gokaba ase ebinto bionsi abwate ase enyomba na emegondo.
6
Ase igo agatiga bionsi ebiarenge nabio ase amaboko a Yusufu; gose taba ogwechandera gento kende gionsi otatiga endagera yoka eria arenge koria. Yusufu nigo arenge omonto omerete buya, naende omonyakieni.
7
Nyuma y’engaki gete moka omonene oye akarigereria Yusufu ase okomogania, akamotebia, “Inchuo orare nainche!”
8
Korende ere akaanga, agatebia moka omonene oye, “Rora, omonene one techandereti gento kende gionsi ase enka yaye, na bionsi ebi abwate obibekire ase amaboko aane.
9
Onde tari ase enyomba yaye oeire okobua kobua inche, gose tantangeti gento kende gionsi otatiga aye bweka, ekiagera aye mokaye ore. Naki rende ndanyare gokora ebibe ebinene buna ebi, imomochere Nyasae?”
10
Akaba okonagokwana na Yusufu rituko ase rituko, korende Yusufu tamwanchera barare komo, gose koba amo.
11
Ekaba rituko erimo, ekero Yusufu asoete nyomba gokora emeremo yaye, gose monto onde bw’abanto b’enyomba eria tarengeo,
12
omokungu oria akamobwata eanga yaye eyare kwambara, akamotebia, “Rara nainche.” Korende Yusufu agatigera omokungu oria eanga yaye eyare kwambara, agatama gochia isiko.
13
Omokungu oria, ekero aroche ng’a Yusufu omotigeire eanga yaye koboko kwaye, na gotama gochia isiko,
14
akarangeria abanto ba nyomba mwaye, akabatebia, “Rigereria, omosacha one otorenteire omonto oyo Omoibirania ase egati yaito atokorere echeche; nigo acha asende ng’a arare nainche, na inche nakuura neriogi rinene,
15
na ekero aigwa ng’a nakuurire neriogi rinene, ontigera eanga yaye koboko kwane, otama gochia isiko.”
16
Akagacha eanga eria goika omosacha oye agacha inka,
17
akamotebia amang’ana ayio ayio, agateba, “Omoibirania oyo omosomba kwarenta aa nabo asoa asende gonkorera echeche.
18
Korende ekero nachaka gokuura na goaka eriogi ontigera eanga yaye koboko kwane, otama gochia isiko.”
19
Ekero omonene o Yusufu achia koigwa aya mokaye amotebirie ng’a, “Aya naro omosomba oo ankorera”, akaba nekeririanda ekenene.
20
Omonene oyio akabwata Yusufu, akamobeka echela ime, aase abasomba b’omoruoti basibire, na ere akaba agwo echela ime.
21
Korende Omonene akaba ore amo na Yusufu, akamokorera obuya, akamoa ogwancherwa ase omonene bw’echela.
22
Omonene oria akabeka abasibwa bonsi abwo barenge echela ime ase amaboko a Yusufu; na onsi ayare gokoreka ase echela, ere akaba okoyakora.
23
Na omonene oria bw’echela tachia goitaa kende gionsi kiare ase amaboko a Yusufu, ekiagera Omonene nigo arenge amo nere, na ande onsi are gokora, Omonene nigo are koyasesenia.
Gussi Bible 2020
OLD EKEGUSII BIBLE PROTESTANT EDITION Bible Society of Kenya, 2020