Moal, abdi-abdi moal wantun ka ditu upami si bungsu henteu diwidian milu mah, margi saur nu ti ditu: Ulah datang-datang deui mun dulur maraneh nu hiji deui henteu kabawa.”
Dijarawab, ”Ituna keukeuh naletekeun pamili urang saurna, ’Ari bapa maraneh aya keneh? Maraneh boga deui dulur?’ Kapaksa diwangsul satarabasna, manawi teh moal dugi ka marentah ngabantun pun adi.”
Yuda unjukan deui ka Yakub ramana, ”Titipkeun Binyamin ka abdi, supados tiasa mios ayeuna keneh. Diengke-engke mah bilih urang maraot manten ku langlayeuseun, nya Ama, nya abdi-abdi, nya barudak.
Perkawis Binyamin, ditanggel ku abdi. Abdi sumeja naruhkeun pati, ngabelaan. Upami manehna teu tiasa kabantun deui wangsul kalayan salamet sarta walagri, abdi sing ulah jamuga satutup umur.
Waler Yakub, ”Nya ari geus teu beunang diulah-ulah mah dalah dikumaha. Tapi kudu babawaan ti dieu, keur tanda soca, bangsa hasil ieu tanah sarwa saeutik, nu pangalusna: kismis, madu, bungbu-bungbuan, muncang, jeung buah badam.
Mugi-mugi ku pitulung Allah Nu Maha Kawasa, eta jelema teh sing aya welasna ka maraneh, kersaeun ngaleupaskeun dulur maraneh anu ayeuna ditahan di ditu, sarta mulangkeun deui Binyamin. Mun kudu nepi ka leungit anak, ari geus teu bisa sumingkir deui mah Ama kari pasrah.”
Seug eta sadudulur teh nyadiakeun keur kikintunan jeung duit dua kalieun, geus kitu arindit ka Mesir jeung Binyamin. Sacundukna ka Mesir, terus ngadareuheusan ka Yusup.
Ana ningali yen Binyamin oge aya, geuwat Yusup marentah hiji gandek, juru kawasa bumina, saurna, ”Ieu semah kami bawa ka bumi. Meuncit sato hiji, maranehna ku kami rek dibawa tuang engke beurang.”
Ari maranehna dibawa ka gedong teh bati rarisi. Ceuk pikiran maranehanana, ”Boa dibawa ka gedong teh dilantarankeun ku duit anu bareto dipulangkeun tea. Boa ujug-ujug breg bae diraponan terus dijieun budak beulian, kalde-kalde dirampas.”
Ari dongkap ka lembur, artos pameseranana teh bet aya di lebet karung masing-masing, palih luhur, tur teu aya nu coceng. Ayeuna eta artos teh dibantun.
Ari jawabna, ”Tong jadi pikir. Teu kudu dipake risi. Anu neundeun eta duit ka jero karung teh tangtu Allah panutan aranjeun, panutan bapa aranjeun, da duit pamayaran tea mah bareto geus katarima.” Geus kitu eta jelema teh ngaleupaskeun Simeon, dipasrahkeun deui ka maranehna.
Yusup misah meja, saderekna meja nu hiji deui, urang Mesirna anu bareng milu ngariung, misah deui, kawantu pikeun urang Mesir mah ngahiji dahar jeung urang Ibrani teh hina.
Meja Yusup sina paeunteung-eunteung jeung meja saderek-saderekna. Ari dariukna diatur dipanta-panta, ti nu pangkolotna panungtungan di nu pangorana. Diatur nurutkeun panta-panta umurna teh maranehna bati silih teuteup bari harookeun.
Ari kadaharanana diberean tina meja Yusup. Hancengan keur Binyamin mah mani lima kalieun keur lanceuk-lanceukna. Brak balakecrakan, dalahar nginum jeung Yusup.