Mme Josefa a laela molaki wa gagwe a re: Tlaletša banna ba mekotla ya bona dijo ka mo ba ka rwalago ka gona; mme molomong wa mokotla wa e mongwe le e mongwe o bee tšhelete ya gagwe.
Mo molomong wa mokotla wa e monyane wa bona o lokele senwelo sa ka sa silifera gotee le tšhelete ya mabele a gagwe. Molaki a dira se Josefa a mo laetšego sona.
Ge ba tšwile mo motseng, ba sešo ba ya kgole, Josefa a botša molaki wa gagwe a re: Nanoga o latele banna bao, mme ge o ba hweditše o ba botšiše o re: Le reng le lefetša botse ka bobe?
Hleng tšhelete yela ra nago ra e hwetša melomong ya mekotla ya rena, re e bušeditše go wena, ya boa e etšwa kua nageng ya Kanana. Bjale re ka utswa bjang silifera le ge e le gauta mo ngwakong wa mong wa gago?
Molaki a re: Go lokile; a go dirwe se le se boletšego. Yo re tlogo mo hwetša a na naso, ke yena a tlogo ba mohlanka wa ka. Lena ba bangwe le tlo ba le se ne taba.
Juda a re: Mongarena, re sa tlo fetola ka lefe? Re sa tlo bolelang ra itlhatswa? Modimo o utollotše molato wa bahlanka ba gago. Bjalo re matlapša a gago, mongarena, rena ka moka gotee le yo a hweditšwego a swere senwelo seo.
Juda a batamela a re: Hle mongaka! A ko lese nna mohlanka wa gago ke bolele. O theetše, mongaka, mme o se ke wa ntukela bogale, nna mohlanka wa gago, le ge o lekana le Farao.
Rena ra botša mongarena ra re: Re na le tata wešo e a tšofetšego, le mošimane yo a mo tswetšego a šetše a tšofetše. Ngwanabo o hwile; ke yena a šetšego a nnoši wa mmagwe; gomme tatagwe o a mo rata.
ge a ka bona lesogana le le se gona, gona o tlo hwa. Ke mo meriri e mepududu ya tata wešo mohlanka wa gago re tlogo e fološetša felo ga bahu ka bohloko.
Ge e le nna mohlanka wa gago ke itlemile ka baka la lesogana le, mme ke tiišeditše tate ka re: Ge ke sa mmušetše go wena, gona o tlo fela o mpea molato ka mehla le mehla.