1
Kɛ jɛn gua̱a̱th ɛmɔ, mëë ci Jo-thɛp thuk tɔ̱tɔ̱ liŋ, /ke̱nɛ lɔcdɛ luäŋ kɛ käp piny nhiam la̱a̱tnikɛ tëë te nhiamdɛ. Inɔ, jɛn cuɛ naath cu tuɔ̱k raar kɛ jɔw mi di̱i̱t i̱, “A nɛy diaal wuɔckɛ rɔ̱ nhiamdä.” Kɛ kui̱ ɛmɔ cuɛ thil ram mi dɔ̱diɛn mi te thi̱n guäth ëë lätdɛ rɔɔdɛ dämani.
2
Jɛn cuɛ röt kɛ jɔw mi di̱i̱t kä cua jɔwdɛ liŋ ɛ ji̱ wec amäni ji̱ dhɔaar Pɛro.
3
Kä cuɛ dämani jiök i̱, “Ɛ ɣän Jo-thɛp ɛnɛ! Gua̱a̱r tëë i̱di, jɛn ŋotdɛ te̱e̱kä?” Kä dämani, mëë cikɛ mɛmɛ liŋ, cuɛ kɛ kuer lath dualä kä /ke̱nkɛ jɛ luäŋ kɛ luɔ̱c.
4
Inɔ, cuɛ dämani cu jiök i̱, “Ti̱eecɛ rɔ̱ thiäkä.” Kä min cikɛ rɔ̱ ti̱ec gekädɛ, cuɛ kɛ jiök i̱, “Ɛ ɣän dämuɔɔrun ni Jo-thɛp, ram ëë kökɛ nɛy ti wä ro̱o̱l I-jëp.
5
Kä täämɛ a lo̱ckun /ci jiɛth, kä /cuarɛ pua̱nykun bɛl i̱ cia ɣä kɔak inɔ, kɛ ɣöö ɛ Kuoth ɛn nëë jäk ɣä kä nhiam kɛ ɣöö bä naath ben luäk.
6
Nɛ̈nɛ jɛ, buɔth cɛ thuŋ tekɛ run da̱ŋ rɛw wi̱i̱ muɔ̱ɔ̱n, kä bi run da̱ŋ dhieec kɔ̱kiɛn ŋot nhiam, min bi ɣɔw thil puɔ̱r kɛnɛ ŋër bɛɛl rɛydiɛn.
7
Ɛ Kuoth ɛn nëë no̱o̱ŋ ɣä ro̱o̱l ɛmɛ kɛ nhiam kɛ kui̱dun kɛ ɣöö bia tekɛ kuay ti tëk.
8
Kɛ kui̱ ɛmɔ, ɛ thuɔ̱k ɛ jɛn Kuoth ɛn nëë no̱o̱ŋ ɣä ɛ wanɛ, kä /ci mɔ yɛn. Kuoth cɛ ɣä jak kä ram in mɔ waŋ Pɛro, kä lapä kuäär gɔaalɛ ni kɛɛliw, kä ɛ ɣän kuäär röölɛ ni kɛɛliwdɛ.
9
Täämɛ kuɛɛ wä kä gua̱a̱r kɛ pɛ̈th kä jiökɛ jɛ i̱ gatdu ni Jo-thɛp ɛ jɛn i̱, ‘Ci Kuoth ɣä jak kä kuäär rööl I-jëp kɛɛliw, cu ben kä ɣä täämɛ a thil gal.
10
Kä ji̱n bi ben cieŋ pe̱e̱k wec in cɔal i̱ Go-cɛn min thiëëk kɛ ɣä. Bia, ji̱n yɛnɛ gaatku kɛ gaat ganku, kɛ ɣɔ̱kun diaal kɛɛl kɛnɛ kuakun diaal.
11
Ɣän bä ji̱ tit ɛn dhɔɔr ɛmɔ, kɛ ɣöö ŋot run buath da̱ŋ dhieec nhiam, kä /cɛ rɔ lot kɛ ɣöö dëë nyinkun thuuk.’
12
Kä nɛ̈nɛ jɛ kɛ wäŋkun, amäni dämaar ni Ben-ya-min bä, ɛn ɣöö ɛ ɣän ɛ nɛ ruac kɛ yɛ mi.
13
Ɛ jɛn, wiaa la̱tdɛ gua̱a̱r luth in ka̱mkɛ ɣä rɛy rööl I-jëp ɛmɛ, la̱tdɛ jɛ tin diaal tin cia nɛn. Kä pɛ̈thɛ, wiaa nööŋɛ jɛ wanɛ mɛ.”
14
Mëë cɛ mɛmɛ thuk kɛ lat, cuɛ rɔ kue̱r gatman ni Ben-ya-min, wieekɛ kɛ tɛ̈th lɔaac, kä cu Ben-ya-min wiee bä.
15
Kä inɔ, cuɛ rɔ kuer dämani kɛ̈l kɛ̈ɛ̈li, wëë kɛ wiee kɛ tɛ̈th lɔaacdɛ. Mëë cikɛ thuɔ̱k kɛ bomni kɛ rɔ̱, cu dämani cu ruac kɛ jɛ.
16
Ɛn guäth ɛmɔ mëë ci thuk cop dhɔɔr Pɛro i̱, “Ci dämani Jo-thɛp ben,” cu Pɛro lɔcdɛ tɛɛth kɛnɛ kua̱r läätädɛ.
17
Kä cuɛ Jo-thɛp jiök i̱, “Lätni dämuɔɔri ŋɔak i̱, ‘Kɛn bikɛ muɔ̱likiɛn moc ɣa̱a̱c kä bikɛ loc rɛy rööl Kɛ-naan,
18
kä bikɛ gua̱ndiɛn wä nööŋ kɛnɛ thuk duëlikiɛn diaal kä bikɛ ben kä ɣä. Ɣän bä kɛ moc mi̱th tin gɔw ni kɛn rööl I-jëp kä ba kɛ cu ben jak kä ro̱ŋ kɛ mi̱th tin luäŋ ni yäk ɛn wi̱c ɛmɛ.’
19
Min dëë mat thi̱n, ɛ ɣöö de̱ri kɛ jak kä muɔckɛ rɔ̱ thurbiɛɛli kä I-jëp ti ba naŋ kɛɛl kɛ kɛ, kɛ kui̱ ɣo̱thä määnkiɛn kɛnɛ nyin tiɛtnikiɛn. Akɛ ɣo̱nh kä nööŋkɛ gua̱ndiɛn.
20
Akɛ /ci diɛɛr kɛ kui̱ nyinäkiɛn kɛ ɣöö ŋɔak diaal tin gɔw ni kɛn rɛy rööl I-jëp kɛɛliw bikɛ a nyinkiɛn.”
21
Ɛ jɛn, cu gaat I-thɛ-rɛl ɛ la̱t kɛ pe̱k in ca la̱t kɛ. Kä cu Jo-thɛp kɛ moc thurbiɛɛli ce̱tkɛ ruac Pɛro, kä cuɛ kɛ moc mi̱th ti ba cam lɛɛr bä.
22
Kä cuɛ ramɔ kä kɛ moc bieyni ti bɛ wäny ni bieynikɛ. Kä kɛ kui̱ Ben-ya-min cuɛ jɛ moc yio̱w riaali ti kur da̱ŋ diɔ̱k kɛ bieyni da̱ŋ dhieec.
23
Kä ti̱ti̱ kɛ kɛn muc tëë cɛ jäk kä gua̱n, tut muɔ̱li da̱ŋ wäl ti ca jio̱kiɛn yiëën ŋɔak diaal tin gɔw ni kɛn kä I-jëp kɛɛliw, kɛ muɔ̱li da̱ŋ wäl ti ŋut ti ca jio̱kiɛn yien kä bɛl kɛ mi̱th kɛ kui̱ ja̱liɛn.
24
Kä min cɛ dämani jak kä jiɛc, cuɛ kɛ jiök i̱, “/Cuarɛ gaak dup.”
25
Kä mëë ci dämani jiɛɛn, cukɛ ben kä gua̱ndiɛn ro̱o̱l Kɛ-naan,
26
kä cukɛ jɛ ben jiök i̱, “Jo-thɛp ŋotdɛ te̱e̱kä, kä jɛn ɛ kuäär rööl I-jëp kɛɛliwdɛ.” Mëë ci gua̱ndiɛn mɛmɛ liŋ, cu lɔcdɛ ti̱r, kɛ ɣöö /ke̱nɛ ruacdiɛn ŋäth ɛn ɣöö de̱rɛ a thuɔ̱k.
27
Kä mëë cɛ tëë diaal tëë ca la̱tkɛ ɛ Jo-thɛp liŋ, kä nɛɛnɛ thurbiɛɛli tin ci Jo-thɛp kɛ ja̱k kɛ ɣöö bikɛ jɛ ben naŋ ro̱o̱l I-jëp, cu lɔcdɛ ben piny.
28
Cu gua̱ndiɛn ni I-thɛ-rɛl kɛ ku jiök i̱, “Cɛ ku thuuk! Gatdä ni Jo-thɛp a te̱e̱kä. Ɣän bä wä kä bä jɛ wä nɛn a ŋuɔtdä /ka̱n ni li̱w.”
Nuer Bible 1998
Nuer Bible Bible Society in South Sudan 1998, 2012