Sodi tolot Yosep nia Parao tolimok tama, “Apot apakang ka talokaatokang anakwap a Kanaan emeto ngamesekin, ka ngaatuk, ta ngibaren kech daang. Eyakasi tokona ama Gochen.”
Erai akwap a Misiri akon, nak apakon ka talokaatokon ewae loajokon noi toloma. Epedorete akilom lowae loa Gochen, ani keyakasi kesi lu iyokoko, toseu toliworos kesi iyokiyete ngibaren kang.”
Sodi Yosep nak apakeng ka talokaatokeng ewae loa ere a Rameses lo ejok noi anakwap a Misiri, toliwor ni elomete. Toloma kesi neni loger lo adungunitor Parao.
Ani edaunosi ngaropiyae a ngitunga kadaang a ngakwapea a Misiri ka Kanaan, pot Ngimisiri daang nia Yosep tolimokis tamasi, “Nakinae akimuj! Kikokini sua kiari akoro kitee iyong ai? Kingolik a, adaun tokona ngaropiyae kosi daang!”
Sodi inut kesi Yosep ngibaren kech daang lu eraakasi ngangolei, ka ngaatuk, ka ngamesekin, ka ngaanei, ka ngisikiria, nak ngesi kesi akimuj. Ekaru ngolo, kitan a akimuj ana elokonyio a ngibaren kech.
Ani ekaru lo atupit ngolo, pot nabo kesi ni ayei ngesi tolimokis tamasi, “Ekapolon, nyikimunoni sua iyong atamar adaunosi ngaropiyae kosi daang nabo aliworosi ngibaren kosi ngikon. Tokona bocha ekapolon, emam ibore iche idongit nikiinakini sua ngikasubak etich kon iyong, mati ngawat kosi ka ngamanat kosi.
Nyikimiek sua kitoaki sodi kinyasun ngamanat kosi itee iyong. Togielae sua ka ngamanat kosi atoliworos ngikedalak a Parao, sodi kiinak iyong sua akimuj. Nakinae akimuj nakiyarea, sodi nyiidong akwap iboi pas.”
Togiel Yosep ngalup daang a Misiri toliwor aka Parao. Togiela itwaan daang a akwap a Misiri amana keng kotere eron a akoro. Toliwor akwap daang aka Parao.
Ani ilemete esi ngamanat, iinakinete esi Parao alemunet apei ani eyakasi nakan. Ani ngalemet naomwon idongete, eliworosi ngikinyam kus ka akimuj kus, ta na a ngitunga a ngawiyei kus.”
Sodi kiwaak Yosep etal nakwap a Misiri toliwor elemuununi itwaan daang alemunet apei ani eyakasi nakan a ngalemet keng nak Parao. Iwapitae etal ngolo tani tokona. Ngalup na ngimurok make nyerauna ngaka Parao.
Ani eapuunete ngirwa lu etoanea ngesi, tanyara lokookeng Yosep tolimok tama, “Ani kichamunit iyong ngakiro kang, tongichak akan kon kiding ngakalokidingo kang sodi kikong atamar kisubea ayong ngakiro na etenooko. Nyikinukak ayong Misiri,