Noh sypalih chhôh tao ei ta, thu thei leipa ta tao awpa ta, noh cha zie cha ama hryuh tyhpa rai a châ. Izi mo ta Zakaw châta noh sysari mâchhiesa ei ta.
Ama mâchhiesana nohzy a chhâ tawhta, Zawsi ta Phiraoh chhôhkha hnohta, “Nama modypa ei châ khiahta cha, ngiachhiepa ta Phiraoh nakhaoh theina liata, hetana heta na chhopa muh vy.
Ei paw ta ei hnohta, ‘Pachâ teh, thi daihmâ ha na ta, Kâna râh liata thlâ ei chao chiehpa liata, cha lia tlai ta na pabu mah y,’ tahpa ta bie na pataihsa ha ta. Chavâta ngiachhiepa ta khy aw sah la, ei paw cha kaw pabu aw na ta, ei zâ lie heih aw,” tah ta.
Zawsi chhôhkha zydua, a unawhzy nata a paw chhôhkhazy chhao a hnohta khy khai ei ta. Ama hawtizy, ama mietaku zawzy nata ama viahchao hrizy deita Kôse râh liata ama siesai.
Zawdâh haosâ liata Atadâ sawhri tlô ei ta, cha liata chaphôtuna vâsâh chhih ngaitapa ta thata chakhei ei ta, cha liata a paw mâchhiesana châta noh sari hmâh ta.
Cha râh liata a pahrâpa Kâna mo ta Atadâ sawhri liata mâchhiesapa cha ama hmô nahta, “He he Izi mo mâchhiesana ru ngaitapa a châ hih,” tah ei ta. Chavâta cha su cha a moh Abelamizarai ama bi. Cha su cha Zawdâh haosâ liata a ypa a châ.
Kâna râh lâ phaoh ei ta, Abarahâ ta thlâ su châta hnei awpa ta, Hiti chyhsa Epharaw liata a lyu chhaota a chaleipa, Kâna râh Mamre kiapâh ta a ypa Mâkâpelâ lyu lôpu liata pabu ei ta.
Ama paw a thi hapa ama hmô nahta, Zawsi unawhzy ta, “Zawsi ta miah a hao aw ta, a chô liata hmo pha leipa eima taopa zydua kha viari miah a thô bâ aw,” tah ei ta.
‘Na unawhzy paraona nata ama moleina zy a ngiahthai mah y, na chô liata hmo ama parao haw, tahpa ta Zawsi nama chho aw,’ miah tah ta. Chavâta tahmâ na paw Zakaw Khazohpa chakaotuhpazy paraona cha rie a ngiahthai mah y,” tah ei ta. Cha hawhta a hnohta bie ama reipa a thei nahta, Zawsi cha cha ta.
Nâmo ta la ei chô liata hmo pha leipa tao a chhuah ei chi ta, châhrasala Khazohpa ta kha hmo kha hmo phapa châta tlao â chhuahpa a châ. Tanoh ta hmo a ypa hawhna heta, chyhsa hrona hluhpi pachhapa a châ thei nawpa ta, Khazoh hmochhuahpa a châ.
Chavâta chi khuh vy. Nâmo nata nama hawtizy ei cha mohôh lymâ aw ei,” tah ta. A unawhzy cha ama thlah palôhpa ta, reikah phapa ta âmo cha bie a chho ta.
Zawsi ta a unawhzy hnohta, “Kei cha thi daihmâ ha na ta, châhrasala Khazohpa ta cha vaw tly aw ei ta. Khazohpa ta he râh tawhta châ chhi papua aw ei ta, Abarahâ, Aisika nata Zakaw zy hnohta bie â taihpa râh lâ a châ chhi aw ei,” tah ta.
Chatawhcha Zawsi ta Izarei sawzy bie pataihsa ta, ama hnohta, “Khazohpa ta cha vaw tly tlai aw ei ta, he su tawhna heta ei ruzy phaoh ha muh vy,” tah ta.