Ngirwa ngulu ka ekisidi a ngirwa kangulu, ayakasi ngitunga lulangir-kooyak noi nakwap. Araakasi kesi ngide lu auriunete talokookeng a ngakujo na euseta tanakookeng a ngitunga. Araakasi ngitunga ngulu ngikiliok lukolong ekilenikinit, nabo ayenikinitae.
Ikokini iyong isubakini nege, eliwor awoyau na alokwap ngamitae amiat apei ka ngatomwon-uni ka nguuni. Eliwor aurianut ngamitae ngatomwon-arei ka ngaarei. Eliwor awoyau na alokidiama ngamitae ngatomon ka ngauni.
Tobur ewae lo alokidiama a atubwa sodi kimiek ngasentimitae ngatomwon-omwon ka ngoomwon anakidingos a ewae alo alokidiama ka ngikwaasea. Todukok ngiwaitin nguuni tooma atubwa, ewae lo alokwap, ka loa alokiding, ta loa alokidiama. Ani erumor, todukok ekidor lokwaas.
Kilomak ngikieny ngigelagelae, ka ngitieng ngigelagelae, ta ngiborei lu eliato ngigelagelae natubwa, sodi toyara. Anauk a apei, toliworos ngiarei make elomarete.