|
| 1 |
|
| Siōng Chú tùi Ná-a kóng, “Lí kap lín choân-ke lóng tio̍h ji̍p tōa-chûn; in-ūi chit sè-tāi ê lâng kan-ta lí tī góa ê bīn-chêng sī gī-lâng. |
|
| 2 |
|
| Só͘-ū lé-gî-siōng chheng-khì ê cheng-siⁿ, lí tio̍h tòa chhit chiah kang--ê, chhit chiah bú--ê; bô chheng-khì ê cheng-siⁿ, lí tio̍h tòa chi̍t chiah kang--ê, chi̍t chiah bú--ê. |
|
| 3 |
|
| Pe-chiáu mā tio̍h tòa chhit chiah kang--ê, chhit chiah bú--ê, thang tī choân-tōe thoân-chéng. |
|
| 4 |
|
| Koh kè chhit ji̍t, góa beh lo̍h-hō͘ sì-cha̍p mî sì-cha̍p ji̍t, chiong góa só͘ chō it-chhè ê oa̍h-mi̍h lóng tùi tōe-chiūⁿ châu-bia̍t.” |
|
| 5 |
|
| Ná-a chiū lóng chiàu Siōng Chú ê bēng-lēng khì chòe. |
|
| 6 |
|
| Tōa-chúi tī tōe-chiūⁿ hoàn-lām ê sî, Ná-a la̍k-pah hè. |
|
| 7 |
|
| Ná-a kap i ê kiáⁿ, i ê bó͘, i ê sin-pū, lóng ji̍p tōa-chûn, siám-pī tōa-chúi. |
|
| 8 |
|
| Lé-gî-siōng chheng-khì ê cheng-siⁿ kap bô chheng-khì ê cheng-siⁿ, pe-chiáu, kap tōe-chiūⁿ teh pê ê tōng-bu̍t, |
|
| 9 |
|
| lóng chi̍t-tùi chi̍t-tùi, ū kang--ê ū bú--ê, khì Ná-a hia, chiàu Siōng-tè tùi Ná-a ê bēng-lēng chìn-ji̍p tōa-chûn. |
|
| 10 |
|
| Chhit ji̍t āu, tōa-chúi tī tōe-chiūⁿ hoàn-lām. |
|
| 11 |
|
| Ná-a la̍k-pah hè hit-nî ê jī-ge̍h cha̍p-chhit hit-ji̍t, chhim-ian ê chúi-goân li̍h--khui, thiⁿ-téng ê chúi-mn̂g lóng phah-khui. |
|
| 12 |
|
| Hō͘ lo̍h sì-cha̍p mî sì-cha̍p ji̍t. |
|
| 13 |
|
| Chiū tī hit-ji̍t, Ná-a kap i ê kiáⁿ, Siám, Hâm, Ngá-hut, kap Ná-a ê bó͘, í-ki̍p i saⁿ ê sin-pū lóng ji̍p tōa-chûn; |
|
| 14 |
|
| só͘-ū ê iá-siù, cheng-siⁿ, teh pê ê tōng-bu̍t, ū-si̍t ê oa̍h-mi̍h, í-ki̍p pe-chiáu, kok chiàu in ê chióng-lūi, lóng kap Ná-a choân-ke chìn-ji̍p tōa-chûn. |
|
| 15 |
|
| It-chhè ū sìⁿ-miā ê oa̍h-mi̍h lóng chi̍t-tùi chi̍t-tùi khì Ná-a hia, chìn-ji̍p tōa-chûn. |
|
| 16 |
|
| Só͘-ū ji̍p tōa-chûn ê tōng-bu̍t, chiàu Siōng-tè tùi Ná-a ê bēng-lēng, ū kang--ê ū bú--ê; Siōng Chú chiū kā tōa-chûn ê mn̂g koaiⁿ--khí-lâi. |
|
| 17 |
|
| Chúi tī tōe-chiūⁿ hoàn-lām sì-cha̍p ji̍t; chúi tiòng-koân, chiong tōa-chûn thìⁿ--khí-lâi, hō͘ chûn tùi tōe-bīn phû--khí-lâi. |
|
| 18 |
|
| Chúi-sè chin tōa, tī tōe-chiūⁿ ti̍t-ti̍t tiòng--khí-lâi; chûn tī chúi-bīn phiau-liû. |
|
| 19 |
|
| Chúi jú-tiòng jú-koân, kā thiⁿ-ē ê koân-soaⁿ lóng im--kè. |
|
| 20 |
|
| Chúi pí soaⁿ koân chhit kong-chhioh; soaⁿ-thâu lóng hō͘ chúi im-liáu-liáu. |
|
| 21 |
|
| Tōe-chiūⁿ só͘-ū ê oa̍h-mi̍h, pau-koat pe-chiáu, cheng-siⁿ, iá-siù, kui-kûn teh pê ê tōng-bu̍t, í-ki̍p só͘-ū ê lâng, lóng sí. |
|
| 22 |
|
| Só͘-ū tī tōe-chiūⁿ ēng phīⁿ-khang chhoán-khùi ê oa̍h-mi̍h lóng sí. |
|
| 23 |
|
| Tōe-chiūⁿ só͘-ū ê oa̍h-mi̍h lóng siū siau-bia̍t; lâng kap cheng-siⁿ, teh pê ê tōng-bu̍t, í-ki̍p khong-tiong ê pe-chiáu, lóng tùi tōe-chiūⁿ siau-bia̍t; chí-ū chhun Ná-a í-ki̍p hiah-ê kap i tī tōa-chûn lāi-bīn--ê iáu oa̍h--teh. |
|
| 24 |
|
| Tōa-chúi tī tōe-chiūⁿ hoàn-lām chi̍t-pah gō͘-cha̍p ji̍t. |
|
|
|
|