To ne onge kama akuru nyalo piyoe, nikech pi ne pod oimo piny duto, omiyo noduogo ir Nowa e yie. Kuom mano Nowa norieyo bade oko mogame, kendo odwoke ei yie.
Chieng’ due achiel, due mokwongo e higa mane Nowa odokoe jahigni mia auchiel gachiel, pi norumo, kendo kane Nowa oelo wi yie, nong’iyo oko, noyudo ka piny otwo.
Eka Nowa nogero ni Ruoth Nyasaye kendo-mar-misango, mi nokawo kit le ka le michamo kod kit winyo ka winyo michamo, motimogo ni Ruoth Nyasaye misango miwang’o pep.
Kane Ruoth Nyasaye owinjo suya mamit, nowacho e chunye niya, “Timbe dhano ok nomi akuong’ piny kendo, nikech aneno ni paro mag dhano richo, chakre nywolne. Bende ok nachak atiek gik mangima kaka asetimoni.”