Sang madason nga adlaw may isa ka pamatan-on nga lalaki nga nag-abot halin sa kampo ni Saul. Sa pagpakita sang iya kasubo gingisi niya ang iya bayu kag nagbutang sing yab-ok sa iya ulo. Nagkadto sia kay David kag naghapa sa duta sa pagpakita sang iya pagtahod.
Si David nagsiling, “Sugiri ako kon ano ang natabo.” Nagsabat sia, “Ang aton mga hangaway nagpalagyo halin sa inaway, kag madamo sang aton mga soldado ang nagkalamatay. Si Saul kag si Jonatan nga iya anak napatay man.”
Nagsabat sia, “Natabuan nga didto ako sa Bukid sang Gilboa kag nakita ko si Saul nga nagapanukod sang iya bangkaw, kag ang mga karwahi kag ang kaaway nga mga soldado nga nagasakay sa kabayo nagapalapit sa iya.
Gani ginkadtuan ko sia kag ginpatay, tungod kay nahibaluan ko nga mapatay man lang sia kon matumba sia. Dayon ginkuha ko ang korona sa iya ulo kag ang pulseras sa iya butkon, kag gindala ko diri sa imo.”
Nagpangasubo sila kag naglalaw, kag nagpuasa tubtob sa gab-i para kay Saul kag kay Jonatan, kag para sa Israel, ang mga tawo sang Ginoo, tungod kay madamo ang nagkalamatay sa inaway.
Ginpamangkot ni David ang pamatan-on nga lalaki nga nagdala sa iya sang balita, “Taga-diin ka bala?” Nagsabat sia, “Isa ako ka Amaleknon, pero nagaestar ako diri sa imo pungsod.”
kag si David nagsiling sa Amaleknon, “Ikaw man lang ang naghalit sa imo kaugalingon. Pareho lang nga ginpatay mo ang imo kaugalingon sang imo pagsugid nga ginpatay mo ang pinili nga hari sang Ginoo.”
Indi ini pag-isugid sa Gat ukon sa mga dalan sang Askelon. Indi pagpasadyaha ang mga babayi sang Filistia, indi pagpahalipaya ang mga anak nga babayi sang mga pagano.
“Kabay nga indi mag-ulan ukon magtulo ang tun-og sa mga kabakuloran sang Gilboa, kabay nga ang iya mga kaumhan manginmamala sa gihapon! Kay ang mga taming sang mga isganan nagkalabilin didto sa kahuloy-an, kag ang taming ni Saul indi na mapahining sing lana.
“Si Saul kag si Jonatan, ginpalangga kag ginhigugma, nag-updanay sila sa kabuhi kag sa kamatayon; mas madasig pa sila sang sa mga agila, mas makusog pa sila sang sa mga leon!
“O mga babayi sang Israel, maglalaw kamo para kay Saul! Ginpabayuan niya kamo sing malahalon nga mga bayu nga pula, kag ginpunihan niya kamo sing mga alahas kag bulawan.
“Nagpangasubo ako tungod sa imo, utod ko nga Jonatan, daw ano ka kamahal sa akon! Daw ano katam-is sang imo gugma sa akon, nga labaw pa sa paghigugma sang mga babayi.