×

Ika Bible 2018

2 Samuẹlụ 10

1
O mẹgụ, eze ndị Amọnụ nọ nwụnhụn, Hanunu nwa a nọ rikin ẹ eze.
2
Defidi nọ sị, “M k'e mẹni Hanunu ihiẹn w'e mẹni ọwụ kẹ nẹdi ẹ wụ Nahashi dọn mẹni m.” Ya Defidi nọ han ndị ụkọ jẹnni Hanunu d'e fichan a ẹnya-mirin makẹ ọnwụn nẹdi ẹ. Ogẹn ndị Defidi zi gi ru alị ndị Amọnụ,
3
ịhaịmẹ ndị Amọnụ nọ sị di-nwọnni wẹ wụ Hanunu, “I rodẹ ni iye nẹdi i ọghọ kẹ Defidi zihẹni ndịnị d'e fichan ị ẹnya-mirin ra? Ẹlẹ ilekpọ kẹ obodo ẹnyi nọ lẹ igi nzuzue chọpụha ụzọ wẹ e gi mẹri ẹ weri k'o zihẹni wẹ?”
4
Ya Hanunu nọ kwọndọn ndị Defidi zihẹ, kọ onyẹ-onyẹ ẹtu azụụn ohu-ohu, bepusọnmẹ ẹwuru wẹ etintinnaị ikẹn, chụ wẹ la.
5
Mgbe wẹ gi gwa eze wụ Defidi ihiẹnni, ọ nọ zi ịhịan d'e kunrun ndị ụkọ hụ ụzọ, makẹni e gbegụọ wẹ ifẹnrẹn ye wẹ ihun ọda-ọda. Eze sị wẹ, “Nọdịgụ nị Jẹriko nị ẹtu ụnụ rukingụ. O rukingụ, ụnụ a lụaha.”
6
Ogẹn o gi we ndị Amọnụ ẹnya nị a kpasugụọ wẹ Defidi iwe ọda-ọda, wẹ nọ jẹn d'e weri ndị-agha alị Aram imẹ Bẹt-Rehobu lẹ Zoba — madụ nnụ-uku ọgụn (20,000) kpọzịkwọ eze ndị Maaka lẹ ndị-agha a nnụ-uku lẹzi ndị Tobu nnụ-uku mmẹbụọ (12,000).
7
Ogẹn Defidi gi nụ ọnwan, ọ nọ zi Jụabụ lẹ ndị-agha a ile d'e kunrun wẹ.
8
Ndị-agha Amọnụ nọ pụha, dọn ogele-agha ọnụ-ụgba obodo wẹ, ndị Aram ahụn ghasọnmẹ Zoba lẹ Rehobu bịa lẹ ndị Tobu lẹ ndị Maaka nọ jẹn d'e werisọnmẹ ọnọdị ibe ugbo.
9
Ogẹn Jụabụ gi hụn a nị ogele-agha rị a ihun lẹ azụụn, ya ọ nọ họrị ndị kachanrịn agha a lụ imẹ ndị Izrẹlụ d'a lụsọn ndị Aram;
10
o bu ndị họdụnị che okpuru Abishaị nwẹnẹ e, sị wẹ d'a lụsọn ndị Amọnụ.
11
Jụabụ nọ sị Abishaị, “Ndị Aram karịma m ẹka, y'a bịa d'e yeni m ẹka; kanị ndị Amọnụ karịma ị ẹka, a bịa m d'e yeni i ẹka.
12
Jikẹnmẹ; nị ẹnyi lụkẹnmẹni ndị nke ẹnyi lẹ obodo ichẹn-ichẹn Chuku ẹnyi ọgụn. Osolobuẹ k'e mẹ ihiẹn rị a mma ẹnya.”
13
Ya Jụabụ lẹ itu ya lẹ wẹ wị nọ jẹnburu ndị Aram d'a lụsọn wẹ ọgụn, ndị Aram nọ gban'a ọsọ.
14
Ndị Amọnụ a hụn kẹ ndị Aram gbapụ, wẹ nwẹn nọ gbazịkwọnị Abishaị ọsọ, gbaban imẹ obodo wẹ. Ya Jụabụ lẹ ndị-agha a nọ lụaha Jerusalẹm kẹ wẹ lẹ ndị Amọnụ lụgụ agha hụ.
15
Ogẹn ndị Aram gi hụn a nị ndị Izrẹlụ e mẹrigụọ wẹ, wẹ nọ zudọnzi.
16
Hadadeza nọ zi wẹ d'e kpọnhẹndẹ ndị-agha Aram rị nfetu Iyi-Yufretisi. Wẹ ile nọ shi Hẹlam d'e weri ọnọdị agha; Shọbakị hụn wụ ọkị-agha Hadadeza kị wẹ.
17
Ogẹn ihiẹnni gi ru Defidi ntịn, ọ nọ kpọzu ndị-agha Izrẹlụ ile, we wẹ fetu Iyi-Jọdanị, shi Hẹlam d'e kunrun wẹ. Ndị Aram nọ dọn ogele-agha wẹ, lụsọn Defidi ọgụn.
18
Kanị, wẹ nọ gbanị ndị Izrẹlụ ọsọ, Defidi nọ gbu mmadụ ọgụn-mmisẹn kwasị nnụ gi ụgbọ-ẹshin a lụ agha lẹ ndị-agha nnụ ọgụn-isẹn (40,000) gi ụkụ e jẹn. Ọ rụzịghọ ọkị-agha wẹ wụ Shọbakị ẹhụ, ọ nọ nwụntọ ebẹhụ.
19
Ogẹn ndị-nze te rị okpuru Hadadeza gi hụn a nị ndị Izrẹlụ e mẹrigụọ wẹ, wẹ nọ rịọ Izrẹlụ nị wẹ dọn, e bu wẹ enwẹn wẹ che okpuru ndị Izrẹlụ. Egun anịzịnị ndị Aram yeni ndị Amọnụ ẹka.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes