Yʋʋmd sẽn vẽke tɩ dĩm dãmb le sɩng b zaba, a Daviid tʋma a tãnsoaba a Zoab ne a neba, ne a Israyɛl fãa, tɩ b tɩ sãam a Amon yagense la b tɩ gãneg tãpo n gũbg Raba, b na-tẽngã. Dĩma a Daviid paa Zerizalɛɛm.
Daar a ye, zĩ-sobdo, dĩma a Daviid yika a gãagẽ, n gõod na-yir bɛonga zugu la a zĩnda bɛonga zugu n yãe pag a ye sẽn sood koom: la pagã da yaa neer al wʋsgo.
A Uri leoka a Daviid: «Kuga walsa koglga, a Israyɛl ne a Zɩɩda tãb-biisa gãee zãnd tẽngre; y tãnsoaben-kãseng a Zoab la a tãnsoaben-taasa gãee tãb-sikẽ. Woto wã marsã, m maanda a wãna n tɩ kẽ m zakẽ, n dɩtẽ, n yũuda la m gãe ne m paga? M kõ maan yell a woto buud ye, m wẽenda!»
La dĩma bool-a lame t'a wa rɩ ne bãmba, n kõ a rãam ali t'a yũ n gãeeme. La zĩ-sobdo a Uri sẽn yi naaba zakẽ, a pa kul a meng yir ye, a kell n paa ne tãb-biis niyns sẽn gũud-b dĩma.
Ãnna n kʋ a Abimelɛk, a Yerubaal biigã? Ka pag n yals lalg zugu n lobg-a ne neer laa? La a ka ki Tebɛs bɩ? Bõe n maan tɩ yãmb pẽneg lalgã?› Dĩma sã n gom-f boto bɩ f yeel-ba: ‹Yãmb tãnsoaba, Ititga a Uri, me kiime.› »
A Daviid yeela raoã: «Tɩ yeel a Zoab woto: ‹Da sãam f sũur tɩ loog, yell kãnga yĩng ye, tɩ sʋʋg rɩta yaare, rũnna yaa ka, beoog ka sẽnẽ. Aya! Ning pãng n zab ne tẽngã n lub-a. Modg n keng f pɛlga!› »
A Batseba sẽn dɩ a sɩd kʋʋr n sɛ, a Daviid tʋmame tɩ b tɩ peeg-a n wa t'a reeg-a a yiri. A Batseba lebga a Daviid paga, n dog a biiga. A Daviid sẽn maan bũmb ningã pa ta Soaala-Wẽnd yam ba bilfu.