Ak kilenji Jonadab inendet, Ru eng’ itogung’ung’, ak iige chito ne miani: si ye nyo kwandang’ung’ kogeerin, ilenji, Asomin ale, ingonyo tupchennyu Tamar konyo kogona amitwogik aam, ak koyaiywa amitwogik eng’ tainnyu, si kobiit ageer, ak kogona eng’ eunnyi, aam.
Ak kinam tabetab karnet ak koluluk eng’ tainnyi; ago kiesio koam. Ak kile Amnon, Ingomanda bik tugul eng’ yu ami. Ak kimanda chi tugul eng’ ye kimi inendet.
Si awa ano anyun, ane, eng’ tewernatennyu? Ak iige inye age eng’ che abusotin eng’ Israel. Ara anyun, asomin ale ng’alalji laitoriat; amu maetenen abunjin.
Ak kiilaachi cheboto ngoriet ne koi: amu kicham kolaachi tibikab laitoriat che bergeinik ngoroik che u choto. Kiimut anyun otwogindennyi inendet konyo sang’, ak kotemel kurget ko kagomong’ konyo sang’.
Ak ye kingosiirto kenyisiek aeng’u, ko kimi Absalom ak bik che kitilei kororikab kechirek eng’ Baal-hasor, ne mi ye negite Epraim: ak kiguur Absalom werik tugul che bo laitoriat.
Ak kimi Absalom ole mi laitoriat, ak kolenji, Keero, tinyei otwogindeng’ung’ bik che tilei kororikab kechirek; asomin ale ingoba laitoriat ak otwogikyik koboto otwogindeng’ung’.
Ak king’at Absalom otwogik kolenji, Ogeero, ye kagobaibait muguleldab Amnon eng’ maiyek; ko, ye alenjok, Okwer Amnon, obar anyun inendet, mat oiywei. Ma ane ne kang’atak? Ogimegitu ak onyiganitu.
Ak kiyachi otwogikab Absalom Amnon ko u ye kiga ng’at Absalom. Kiing’eetyo anyun werik tugul che bo laitoriat, ak kilany chi tugul nyumbunnyi, ak komwei.
Ago kimwei Absalom. Ak kitobendo murenet age ne kiripsei, ak kogeer, ak ogeero, kibwanei bik che chang’, kobunu oretab tegeiyat ne kimi let eng’ inendet.