ka o daa tim Tɛkɔa nti zaŋ paɣ’ so ŋun mali yɛm na ti yɛl’ o, “Niŋmi kaman a nira n-kpi ka a kumd’ o zuɣu la. Zaŋmi kuyili situra niŋ amaŋa ka di ʒe kpam, amaa kul niŋmi kaman paɣ’ so ŋun nir’ kpi ka o kumd’ o zuɣu dabisi’ gbaliŋ la
Ka pumpɔŋɔ bɛ dɔɣiriba zaa suhuri yiɣisimi bahi mani ŋun nyɛ a dabipaɣ’ ŋɔ zuɣu ka yɛli, “Zaŋm’ ŋun ku o mabia maa ti ti ka ti ku o, o ni ku o mabia maa zuɣu din ni chɛ ka bɛ ku falidir’ maa gba. Lala n-ni chɛ ka bɛ kpihi buɣimsal’ shɛli din kpalim maa din ni chɛ ka bɛ kpihim n yidan’ maa zuliya min’ o yuli dunia yili.”
Ka paɣ’ maa daa yɛli, “Naa, n suhir’ a mi, pom’ Yawɛ ŋun nyɛ a Naawuni ŋɔ ni a ku chɛ ka ŋun yɛn bɔhi ʒim yihibu biɛri maa ku o din ni chɛ ka bɛ ku ku m bia maa.” Ka naa daa yɛl’ o, “Hal ka Yawɛ ŋun be ŋɔ zuɣu, a bia maa zabigu zaɣ’ yini gba ku yi o zuɣu ni lu tiŋa.”
Ka paɣ’ maa daa yɛl’ o, “Ka bɔ n-niŋ ka a lo ni a niŋ Naawuni niriba zaɣ’ biɛɣu? Dama naa yi bi chɛ ka o bia ŋun be yɔɣu la labina yaha, dindina naa yɛtɔɣa ŋɔ nyɛla din gbaag’ omaŋmaŋa.
Di kpala talahi ni ti zaa kpi; ti ŋmanila kom din kpaai bahi tiŋa ka nir’ ku lan tooi va li la. Amaa Naawuni ni tiligi ninvuɣ’ so ŋun bi yih’ o bia ŋun zo n-kpe yɔɣu o daŋ ni.
Pumpɔŋɔ n kamina ni n ti yɛli nyini n dan’ naa dimbɔŋɔ, dama niriba maa chɛmi ka dabiɛm gbaai ma pam ka n tɛhi ni n yi yɛli nyin’ naa, di pa shɛli a ni niŋ man’ ŋun nyɛ o dabipaɣ’ ŋɔ ni bɔr’ shɛm maa.
Dama naa ni wum n fabila maa ka fa m mini m bia ŋun nyɛ a dabili maa ninvuɣ’ so ŋun bɔr’ ni o ku ti n-kpihim ti birili Naawuni ni zaŋ tiŋgbɔn shɛli ti ti ŋɔ ni la nuu ni bahi.
Man’ ŋun nyɛ a dabili ŋɔ daa lan tɛhimi ni nyin’ naa yɛligu nyɛla din ni ti ma vuhim, dama nyini n dan’ naa ŋmanila Naawuni malaika ŋun mi zaɣ’ suŋ ni zaɣ’ biɛɣu. Yawɛ ŋun nyɛ a Naawuni ŋɔ ni be a sani.”
Ka naa daa bɔh’ o, “Jɔab nuu be a ni yɛli shɛli ŋɔ zaa ni bebɔ?” Ka paɣ’ maa garigi yɛl’ o, “Biɛhiŋ kani, hal ka nyini n dan’ naa ŋun be ŋɔ zuɣu, so ku tooi ŋmalig’ o nudirigu polo bee o nuzaa polo n-yi nyini n dan’ naa ni yɛli shɛm ŋɔ ni. A dabili Jɔab n-chɛ ka n niŋ dimbɔŋɔ maa, ŋuna n-zaŋ yɛtɔɣa ŋɔ zaa niŋ man’ ŋun nyɛ a dabili ŋɔ nol’ ni.
A dabili Jɔab bɔrimi ni o mali yɛla zali dɛde, dina n-chɛ ka o niŋ lala maa. Amaa n dan’ mali yɛm kaman Naawuni malaika ni mali yɛm shɛm la din ni tooi baŋ binshɛɣukam din be dunia ŋɔ ni.”
Ka Jɔab daa gbani zaŋ o zuɣu silim tiŋa n-lu naa sizuura ka suhi alibarika niŋ naa ni ka yɛli, “Zuŋɔ mani ŋun nyɛ a dabili ŋɔ baŋya ni nyini n dan’ naa baɣa be n ni, a ni saɣi man’ ŋun nyɛ a dabili ŋɔ ni bɔri shɛm maa zuɣu.”
O daa yi chɛ o zabiri o zaŋdila nayili sania zahim li ka di tibisim nyɛ kaman kilɔgiram ayi. (Dama o daa yi chɛr’ li la yim yuuni puuni; di daa yi ti zibigi ka tibisa, o chɛr’ li mi)
Di nyaaŋa ka Absalom daa tim ti boli Jɔab ni o kana ka o tim o naa sani, amaa ka Jɔab daa zaɣisi kandina. Ka o lan tim pahi buyi, amaa ka Jɔab kul bahi zaɣisi kandina.
Di nyaaŋa ka Absalom daa yɛl’ o tumtumdiba, “Nyamiya, Jɔab puu m-baɣi m puu ka siŋkaafa be di ni la, chamiya ti niŋ buɣim nyo li. Ka Absalom tumtumdiba maa daa shiri chaŋ ti niŋ buɣim nyo puu maa.”
Ka Absalom daa garigi yɛli Jɔab, “Nyama, n daa tim na ti bol’ a ni a kana ka n tim a naa sani ka a ti bɔh’ o “Bɔzuɣu ka n lee yi Gɛshur n-kul’ kpɛna? N yi di na kpalim be nimaani di di so. Dinzuɣu, pumpɔŋɔ zaŋm’ ma chaŋ naa sani, n yi mali taali, ŋun’ kum’ ma.”