A Daviid sẽn wa n loog tãnga zug tẽnsʋk bilfu, a Mefibaal dakõor a Siba wa n seg-b-la ne bõeens a yiibu, sẽn zɩlg bur kobs-yi, sib koeems gĩin koabga, zĩ-lik paalg tɩɩs bi-moaama n paas lɩng sẽn pid ne rãam.
Dĩma soka a Siba: «Fo rat n maana bõe?» T'a Siba leoke: «Dĩma zak rãmba n na n zomb bõeensã, burã ne tɩɩsa biis na n yɩɩ kom-bõonega rɩɩbo, la rãama na yɩ-la b bõn-yũudla, b sã n wa yɛ we-raoogẽ wã!»
Dẽ la dĩma yeel a Siba: «A Mefibaal sẽn tar bũmb ning fãa, rũnna tɛka yaa foom n so.» T'a Siba fõgneg a neng tẽnga n yeele: «Y barka, m naaba, y yama sẽn kẽ-m yĩnga!»
A Daviid waa n ta Bawurim. La ade, daoa a yembre n yi be, a ra yaa a Sol buudu la a boondame t'a Simeyi, a ba yʋʋr la Gera. A ra yita tẽngã la a kãabd kãab wẽnse,
N-faa! Soaala-Wẽnd lɛɛg n sudg f zugu, a Sol rooga fãa zɩɩm, f sẽn daage n paam n gʋsg a naama n deege. La gese, Wẽnd le reega f naama n ning f biiga, a Absalom, nugẽ. Ad fo sẽn lebg nin-yaalga, la foom n bao, tɩ fo yũu neb zɩɩm.»
A Abisayi, a Seruya biigã, yeela dĩma: «Bõe n maan tɩ baagã, ba-kɩɩngã, wa tʋʋd m naaba la m zu-soaba? M naaba, y kabre! Bas-y-m tɩ m kẽng n tɩ rok a zugu!»
Tɩ dĩma yeel-a: «Maana a wãn tɩ m weoog kẽed foom, Seruya biiga? A sã n tʋʋd maam, Naaba-Wẽnd sã n yeel-a: ‹Kẽng n tɩ kãab a Daviid beedo,› ãnna n be noor n sokd-a: ‹Bõe yĩng la a maand woto?› »
Dĩma le yeela a Abisayi ne a poorẽ dãmbã: «Mam meng bi-roak sẽn tʋlg n dok m yõore, tõnd na le gom dao kãnga sẽn yaa a Bẽnzame sakẽ neda? Bɩ y bas-a t'a kãab beedo, Soaala-Wẽnd sã n yeel-a t'a kãab beedo.
A Daviid ne a neba kell n tuda b sore. La a Simeyi da kẽnda tãnga pennẽ n yegd a Daviid; a ra kẽndame la a kãabd dĩma la a lobd-a kuga la a wʋkd tom n fẽed-a.
A Ayitofɛl yeela a Absalom: «Kẽ-y ne y ba sẽn bas pagb niyns tɩ b gũ zakã, la woto, a Israyɛl zãng fãa na bãnge tɩ y kɩtame, tɩ y ba wã pa tõe n pa rɩ beem ne y ye, la y na keng sẽn be-b yãmb poorẽ wã fãa sũuri.»
Wakat kãnga, a Ayitofɛl sẽn da sagend sagls niynsã fãa, b da reegd-b lame, wala sagls sẽn yi Soaala-Wẽnd nengẽ. A Ayitofɛl saglsa fãa da tara pãnga a Daviid wala a Absalom yĩnga.