Ya re ge Dafida a sa katoga thaba a etla patogeng, gwa fihla Tsiba mohlanka wa Mefibosethe a dumesida; o be a na le dipokolo tše pedi, di belešitšwe dinkgwa tše makgolo a mabedi, le mekwapi e lekgolo ya morara, le lekuka la beine.
Kgoši ya botšiša Tsiba ya re: O dirang ka dilo tše? Tsiba a re: Dipokolo ke tša go namelwa ke ba mošate; dinkgwa le dikenyo tše ke mefago ya bahlanka; beine ke ya go tlo nowa ke ba ba lapago šokeng.
Kgoši ya re: Morwa wa mong wa gago o go kae? Tsiba a fetola a re: Yena o šetše Jerusalema, gobane a re: Bjale setšhaba sa Isiraele se tlo bušetša bogoši bja tate go nna.
Kgoši ya re: Gona tšohle tše e lego tša Mefibosethe e tlo ba tša gago. Tsiba a re: Ke a lotšha; anke mahlo a gago ke fele ke hwetša e le a mašweu, Kgoši Mongaka!
Ya na ya re ge kgoši Dafida a etla Bahurimi, gwa tšwelela monna e mongwe wa moloko wa Saulo; leina la gagwe e be e le Simei morwa wa Gera; yena eo a tla a tšama a rogaka;
Morena o go bušološetša madi ka moka a leloko la Saulo, eo o ipeilego kgoši bakeng sa gagwe. Bjale bogoši Morena o bo neile Abesalomo morwa wa gago. Ke bjona bošula bjo bo go lebanego, ka gobane o motho wa madi.
Kgoši ya re: Taba tša ka ga se tša lena barwa ba Tseruya. Mo leseng a roge. Ge a laetšwe ke Morena gore a roge Dafida, ke mang e a kago re: O dira bjalo o reng?
Gomme Dafida a bolela le Abisai le bahlanka ba gagwe ka moka a re: Nke le boneng! Ge ešita morwa wa ka a tsoma bophelo bja ka, bjale monna e wa ga Benyamini a a ka lesa go dira ka mokgwa woo? Mo leseng a roge, o laetšwe ke Morena.
Dafida le banna ba gagwe ba fela ba ikela ka tsela; gomme Simei a fela a sepela a bapetše le Dafida a le thabeng, a tšama a roga, a betša ka maswika le ka makokota.
Husai a re: Aowaa, nna ke tlo ba wa gabo eo a kgethilwego ke Morena, a kgethilwego ke setšhaba se le banna ba Isiraele ka moka. Ke yena ke tlogo dula nae.
Le gona ke tlo ba mohlanka wa mang? A ga ke re ke tlo ba mohlanka wa morwa wa gagwe? Ke tlo ba mohlanka wa gago ka mokgwa wo ke bego ke šika le tatago ka wona.
Ahitofele a eletša Abesalomo a re: Tsena basading ba direthe ba tatago, ba a ba tlogetšego gore ba lete ngwako. Ke mo Baisiraele ka moka ba tlogo lemoga gobane o kgaogane le tatago sa ruri; ke mo ba ba nago le wene ba tlo go tiiša maatla.
Mehleng yeo keletšo e tšwago go Ahitofele e be e le bjalo ka phetolo e tšwago go Modimo. Dikeletšo tša Ahitofele di be di le bjalo mola a sa na le Dafida, le bjale a na le Abesalomo.