×

Biblia Ande Chib Romani 2018

2 Samuel 17

1
Ondaka o Ajitofel phenda e Absaloneke: Me ka esviriv desudui milie murusen, ta isto gaia riat ka llav te rodav e Davide.
2
Kana vou ka avel chinio ka dav pe lete, ka daravav le ta sa o foro kai si lea ka nasel. Ta kana o charo ka achel korkorre, me ka mundarav le,
3
soke tu mange te mundare samo iekhe llene. Gia ka cherav te irilpe tute o foro, ta kana sa ka aven tuia ka avel e pas.
4
Goia orba pela drago e Absaloneke ta e phurenge katar o Israel.
5
Ta o Absalon ikharda e Jusaie arkitae te asunel so mislila vou.
6
Kana o Jusai avilo, o Absalon phenda leke: Gia mangel te cherel o Ajitofel ¿Ka chera le gia o iok? Phen amenge so misli tu.
7
Ondaka o Jusai phenda e Absaloneke: Inai sukar so mislil o Ajitofel.
8
Tu llane kai cho dad ta leke boñikura si murusa tromane ta von si pherde zalba, sargo e melleda kana len latar lake minonen. Ta i cho dad si murus marimako, ta gaia riat ni ka mukel e foro te lelpe lendar o chinipe.
9
Akana vou gurudol ande iek pechina o ande aver than. Sai avel kai ando maripe ka peren nesave katar che boñikura, ta ando foro ka mislin kai dobisarde tut,
10
ta i o lleno tromano kai leko lio si sargo lionoko ka jasarel sa pi zor, soke sa o Israel llanel kai cho dad si iek lleno tromano, ta e llene kai si lea si zurale.
11
Me phenav kai mai sukar avela te chidiniaon tuia sa e israelitura katar o Dan llik o Berseba sargo e chisai e moraki, ta tu te inllaren len po maripe.
12
Ondaka ka da pe cho dad kaigo avela, ta ka pera pe lete sargo o pai kana pechalpeke pe phuv, ta ni ka muka llundo lendar ni iek.
13
A te gurudol ande iek foro, sa e israelitura e solenchar ka inllara terrindo e foro karing o pai, ta ni ka achel ni iek bar katar gua foro.
14
Ondaka o Absalon ta sa e israelitura phende kai sar phenela o Jusai saia mai sukar neko o Ajitofel. Soke isto o Del murisarda so mangela te cherel o Ajitofel te sai avel e zatrania po Absalon.
15
Mapalal o Jusai phenda e poponenge e Sadokeke ta e Abiatareke so mangela te cherel o Ajitofel, ta so phenda vou te cheren,
16
te sigaren te phenen le e Davideke te na nakhen e riat pe umalia katar o pusto, ta oma te nakhen o Jordan te na mundaren e charo ta sa e foro kai si lea.
17
Ta o Jonatan ta o Ajimaas sea pasa o bunari katar o Rogel, ta iek diskinia sluga avili te phenel lenge soke von nasti sikadona e foroke, ta von llele te phenen le e charoke o David.
18
A iek chaurro dikhla len ta llelo kai o Absalon te phenel leke. Ondaka o Jonatan ta o Ajimaas sigarde te nasen ta avile ando Bajurim, ta gurudile ando o bunari kai saia ande iekhe lleneko cher.
19
Ta e rromi katar gua lleno thoda upral po bunari iek gertachi ta pe lete chudia lliu, ta niko ni llangla niso.
20
Kana avile e sluge katar o Absalon, puchle e diskinia: ¿Kaitalen o Ajimaas ta o Jonatan? Ta e diskinia phenda lenge: Von nakhle katar ta llele ando Jordan. Ta e sluge llele te roden len, a ni malade len ta irisaile ando Jerusalem.
21
Ta kana e sluge lleletar, putarde o bunari ta o Ajimaas ta o Jonatan likiste ta llele kai o David te phenen leke te ustel ta te nakhel o pai, soke o Ajitofel phendaia te den pe lete.
22
Ondaka o David ustilo ta sa o foro kai saia lea, ta sa nakhle o Jordan mai anglal te pharron e zore. Sa nakhle, ni iek ni achilo bi te nakhel o Jordan.
23
Ta kana o Ajitofel dikhla kai ni cherde pe leko, ustilo pe iek magarcho ta llelotar kai po cher. Mapalal kana lacharda sa e ezgode katar pi familia, umbladape. Gia mulo o Ajitofel ta prajosarde le pasa o limori leke dadeko.
24
Ta o David avilo ando Majanaim. Ta o Absalon nakhlo o Jordan sa e llenenchar katar o Israel.
25
Ta o Absalon thoda e Amasa gazda katar e boñikura po than katar o Joab. O Amasa saia chavo katar iek lleno ando Israel kai ikhardola Itra. Gua Itra amisailo e Abigailaia e chorri katar o Najas, a e Abigail saia e phei katar o Seruia ta e dei katar o Joab.
26
O Absalon ta sa o Israel logle ande phuv katar o Galaad.
27
Kana o David avilo ando Majanaim, likiste te maladon lea o Sobi chavo katar o Najas kai saia katar e Raba ande phuv katar o Amon, o Makir chavo katar o Amiel kai saia katar o Lodebar, ta o Barzilai kai saia katar o Rogelim ande phuv katar o Galaad.
28
Ta ande e Davideke ta e llenenge kai sea lea, astukura, tasura, piria, lliu, sebada, arina, simicha peki, lenteje, abe, garbanso peko,
29
aullin, kaimako, bakre ta chiral guruvano te jan, soke phenena kai o foro saia bokhalo ta trusalo po pusto.
Romani Ursari Bible 2018
Biblia ande chib Romani Sociedad Bíblica Chilena, 2018
:
Save Notes