Nopogo jolweny e migepe adek. Migawo achiel noketo e bwo Joab, to moro e bwo Abishai wuod Zeruya, omin Joab, kendo mar adek e bwo Itai ja-Giti. Nowacho ni jolweny niya, “An bende adhi kodu e lweny.”
To jolweny nodwoke ni, “Ok didhi kodwa, nikech wan kata kapo ni waringo, kata kapo ni ginegowa mathoth, to mano ok gimoro. To in iromri gi ji alufu apar kuomwa. Emomiyo owinjore idong’ mondo ikonywa gi ka.”
Ruoth nochiko Joab gi Abishai kod Itai niya, “Akwayou ni kik uhiny rawera ma Absalom.” Jolweny duto nowinjo ka ruoth chiko jotelo ni kik gihiny Absalom.
Absalom nopo koromo gi jolwenj Daudi. Noyudo oseidho kanyna, to kane kanyna kadho e tiend yath maduong’ ma bedene okar, wi Absalom nomoko e bad yadhno, mi nodong’ koliero kanyo e kor muya, to kanje nodhi adhiya.
To ng’atno nodwoko Joab niya, “Kata da ni imiya fedha gana e lweta, to ok dater lweta kuom wuod ruoth, nimar ne wawinjo ka ruoth chiki kaachiel gi Abishai kod Itai niya, ‘Akayou ni kik uhiny rawera ma Absalom’.
Jolweny noduogo mokawo ringre Absalom, mi gibolo e bugo matut mane ni e bungu, kendo ne gidhuro kuome kite mang’eny, molokore pith maduong’. To jo-Israel duto noringo nyaka miechgi.
Kane Absalom pod ngima, noyudo osechungo siro e Holo mar Ruoth, mondo obedne ka rapar. Nowacho niya, “Aonge gi wuowi ma dichung wiya kasetho.” Omiyo nochako sirono nyinge owuon, kendo pod iluonge ni Rapar mar Absalom nyaka chil kawuono.
Ahimaaz nodwoke niya, “Kata da nadi, to nyaka aring adhi.” Omiyo Joab noyiene mondo oring odhi. Mi Ahimaaz noringo, koluwo yor paw aora Jordan moyombo ja-Kush.
Noyudo Daudi obedo e kind dhorangach maoko gi maiye, kendo jarit ne ni ewi dhoranga ohinga. Kane jaritno oting’o wang’e, noneno ng’at man kende ka ringo.
Ruoth nobwok ahinya, moidho e ot mane ni ewi dhorangach, koywak kama: “Yaye, Absalom wuoda, wuoda! Yaye, Absalom wuoda, mad an ema atho kari, Absalom wuoda, wuoda!”