|
| 1 |
|
| Uka qhipatsti, Davidax Tatituruw jiskt'asïna, jupar sänwa: ——¿Kawkïri markanakatix Judá tuqinkki ukanakar sarañax wakisispati? —sasa. Tatitusti sarakïnwa: —Jïsa, sarañamax wakisiwa —sasa. Ukat Davidax jiskt'asïna: —¿Kawkirus saräxa? —sasa. Tatitusti ukxaruw sarakïna: —Hebrón markar saram —sasa. |
|
| 2 |
|
| Davidasti Hebrón markaruw pani warmipamp saräna: Jezreel markankir Ahinoám sat warmipampi, Carmel chiqankir Nabal chachan Abigail sata ijma warmimpi. |
|
| 3 |
|
| Jupamp chika sarnaqir jaqinakapsa irpasxarakïnwa, sapa maynirus wila masinakapamppach irpxäna, ukatsti jupanakax taqiniw Hebrón marka jak'a markanakan utjnuqtapxäna. |
|
| 4 |
|
| Uka qhipatsti Judá uraqinkir jaqinakaw ukar purintanipxarakïna, ukatsti ukan Davidarux Judá markan reyipäñapatak utt'ayapxäna. Juparusti Galaad chiqankir Jabés markankir jaqinakan Saúl reyir imt'xapxatap yatiyapxäna, |
|
| 5 |
|
| ukat Davidax Jabés markankirinakar jaqinak khithäna akham sapxañapataki: “Tatituw jumanakar aski waxt'äwinak churxapxätam, khuyapt'ayasiñ chuymampi Saúl reyin janchip imt'xapxatamata. |
|
| 6 |
|
| Tatituy khuyapayasiñampi, chiqa chuymampi jumanakar uñjpan. Nayasti, ukham lurapxatamat sum jumanakarux uñjapxarakïma. |
|
| 7 |
|
| Jichhasti jumanakax ch'am katxatapxam, janirak thayjtapxamti, jumanakar apnaqir Saúl reyix jiwatäkchi ukasa, jichhasti Judá ayllunkirinakaw nayar reyit utt'ayitu jumanakar apnaqañataki” sasa. |
|
| 8 |
|
| Ukchañkamasti, Saúl reyin ejercitopan jach'a jilïrïkatayna uka Ner jaqin Abner sutini yuqapax, Saúl reyin Is-bóset sat yuqaparuw Mahanaim sat chiqar irpxaruwayäna, |
|
| 9 |
|
| ukan juparux Israel markan reyipat utt'ayäna. Ukhamat Is-bóset chachax Galaad, Gesuri, Jezreel, Efraín, Benjamín, uka markanak apnaqäna. |
|
| 10 |
|
| Kunapachatix Is-bóset jaqix Israel marka apnaqañ qalltkän ukapachax, pusi tunka maranïnwa, pä marakiw apnaqawayäna. Ukampis Judá ayllunkirinakakiw Davidarux reyipat uñt'asipxäna. |
|
| 11 |
|
| Ukat Davidax Hebrón markan qhiparäna, ukatsti paqallq mara, suxta phaxsiniw Judá marka apnaqäna. |
|
| 12 |
|
| Mä urusti, Abner jaqimpi, Is-bosetan yanapirinakapampix, Mahanaim chiqat mistuwayasin Gabaón chiqaruw puripxäna, |
|
| 13 |
|
| kawkintix uma imañax utjkäna ukkharu. Ukawjan jupanakax Seruiá jaqin Joab yuqapampi, Davidan jaqinakapampiw jikintasipxäna. Uka pä tamasti purap tuqin wakichrantasipxäna, mayninakax maykatana, mayninakasti maykatanaraki. |
|
| 14 |
|
| Ukat Abnerax Joab chachar säna: —Waynanak mistupxpan jiwas nayraqatan nuwasiñataki —sasa. —Walikiwa —sasaw Joab chachax sarakïna. |
|
| 15 |
|
| Ukhamasti, Benjamín ayllunkirimpita, Saúl reyin Is-bóset yuqapan tamapankirimpitxa, tunka payan waynanakaw nayraqatar mistüna, Davidan tamapankiritsti tunka payaniw misturakïna. |
|
| 16 |
|
| Ukatsti sapa mayniw uñisiriparux p'iqit katuntasin espadamp jaraphit chhuqhuntäna, ukhamat taqini jiwarat uñjasipxäna. Ukat Gabaón marka jak'ankki uka chiqax “Espadanakan pampapa” sataxa. |
|
| 17 |
|
| Uka urusti nuwasiñax walt'atapunïnwa, Davidan soldadonakapaw Abnerampiru, Israelan tamanakapampir atipjäna. |
|
| 18 |
|
| Seruiá jaqin kimsa yuqanakapax ukankapxänwa: Joab, Abisai, Asael jupanaka. Asaelax pampa tarujar uñtataw wal jalirïna, |
|
| 19 |
|
| jupasti Abneraruw arktäna, jan kawksarus jaltxañapataki. |
|
| 20 |
|
| Abnerasti qhipäxar uñtasax jach'at arsüna: —¡Jumax Asaelarakïtasä! —sasa. Jupasti ukxaruw säna: —¡Jïsa, nayätwa! —sasa. |
|
| 21 |
|
| Ukat Abnerax sarakïna: —Jan juk'ampi arknaqkxistati. Uka uywatanakat maynir katuntam, ukatsti kunanaktix apki ukanak taqpach katusxarakim —sasa. Asaelasti arktaskakïnwa janiw antutañ munkänti, |
|
| 22 |
|
| ukat Abnerax wasitat säna: —¡Jan juk'amp arknaqkxistati, jan ukasti jiwayämawa! Ukatsti, ¿kuna ajanumpirak Joab jilamar uñstästi? —sasa. |
|
| 23 |
|
| Ukampis Asaelax arktaskakïnwa, ukat Abnerax Asaelan purakapat lanzamp chhuqhuntäna, jikhanïxat junstayañkama, Asaelasti ukkharpachaw jiwat jaqutattäna. Ukatsti taqi khitinakatix uka chiqaru purinipkäna ukanakasti, jupar uñjañatakiw sayt'asipxäna. |
|
| 24 |
|
| Ukampis Joab jaqimpi, Abisai jaqimpix Abnerar arktasipkakïnwa. Inti jalantarusti Amá sat qullu pataruw puripxäna, uka qullusti Guíah uñkatasinkiwa, Gabaón wasarar sarañ thakhina. |
|
| 25 |
|
| Ukan Benjaminankir jaqinakax Abnerar yanapt'añatak tantachasipxäna, ukatsti mä tamar tukusakiw qullu patan nuwasiñatak wakicht'asipxarakïna. |
|
| 26 |
|
| Ukat Abnerax Joab chachar art'äna: —¿Janit aka jiwarayäwix tukuskani? ¿Janit amuykta aka luräwix jan walt'añaki apanirapistani ukxa? ¿Kunapacharak jaqinakamar säta jilanakapar jan juk'amp arknaqxañapatakisti? —sasa. |
|
| 27 |
|
| Joab chachasti ukxaruw sarakïna: —Juramentompiw Dios nayraqatan arsurapsma, janitix uk qhanañchkasamän ukaxa, jaqinakaxax qhanjtaniñapkamaw jilanakapar arknaqaskakisapäna —sasa. |
|
| 28 |
|
| Ukatsti ukspachaw Joab jaqix trompetanak phust'ayäna, jaqinakapasti israelitanakar arknaqañ suyt'xapxänwa, ukat uksarusti janiw jupanakamp nuwaskxapxänti. |
|
| 29 |
|
| Abnerampi, jaqinakapampisti uka paqar arumaw Arabá sat pampanjam sarapxäna. Jordán jawir makhatasasti, chika uruw Mahanaim chiqar puripxäna. |
|
| 30 |
|
| Joab chachax janiw Abnerar arknaqkxänti, ukatsti taqpach jaqinakaparuw tantachthapïna, jakthapisinsti Davidan jaqinakapat tunka llätunkaniw jiwaratayna, Asael chachas jiwarakitaynawa. |
|
| 31 |
|
| Ukampisa, Davidan arkirinakapax, Benjaminan ayllupankirimpita, Abneran jaqinakapankirimpitxa, suxta tunkan jaqinakaruw jiwarayatayna. |
|
| 32 |
|
| Uka qhipatsti, Joab chachampi, jaqinakapampix Asaelan amayap Belén markar apasin awkipan sepulturaparuw imt'xapxäna. Jupanakasti uka arum paqariw sarapxäna, willjtarusti Hebrón markaruw puripxäna. |
|
|
|
|