Antû bau ba Gibeoni bareera Daudi atîrî, “Saûlû nîwe wacwaga gûtûûraga na nîwe weendaga gûtûthiria buru nîkenda tûtîgatûûre no kû nthîgûrûûne ya Israeli.
nî eetîre arajûkia marûitû ja Saûlû na ja mûtaana waawe Jonathani kuuma kîrî antû ba Jabeshi-gileadi. Antû bau nîbo baarî bakuiya marûitû jau kuuma antû arîa gwatirimanagîrwa Bethishani, arîa Afilisti baacuurîrie mîîrî ya Saûlû na Jonathani bakûboragîra Giliboa.
Barajathika kaburiine ga Kishi, îthe wa Saûlû, narîa Zela, nthîgûrû ya Benjamini. Barathithia o ûrîa mûnene aaugîîte. Nyuma ya kûthithia ûu, Mûrungu aracokia maromba jaao.
Naku nî gwookîre ndwaa kaîrî gatîgatî ga Israeli na Afilisti. Daudi nî eetîre amwe na nthûûmba ciaawe kûrwaa na Afilisti, na barî ndweene Daudi aranoga.
Ishibibenobu, ûmwe wa nchiarwa cia imuntû bibinene ûrîa îtumo rîaawe rîaarî rîa ûrito bwa kilo ithatû na nusu cia îturutia na waciogeete rûchiû rûrwerû, nî oonîre teeka oomba kûûraga Daudi.
Nyumeene, nî kwagîîre na ndwaa kaîrî gatîgatî ga Israeli na Afilisti ntûûreene ya Gobu. Sibekai wa kuuma Husha arooraga kîmuntû gîeetagwa Safu ûmwe wa nchiarwa cia imuntû bibinene.
Ningî nî kwagîîre ndwaa kaîrî gatîgatî ga Israeli na Afilisti ntûûreene ya Gobu. Elihanani mûtaana wa Jairi kuuma Bethlehemu arooraga Goliathû wa Gathi, ûrîa îtumo rîaawe rîaarî na rûthîrî rwarîo rwang'anaga ta mûgaamba jwa gwokothera mîrigi ya gûtuma.
Kûragîa na ndwaa kaîrî kûu ntûûreene ya Gathi. Naku kwaarî na kîmuntû kîmwe gîkînene mono kîaarî na biara bitantatû o njara na bitaantatû bia o kûgûrû. Biara biaawe bionthe bia njara na magûrû biaarî mîrongo îîrî na bina. Nawe aarî ûmwe wa nchiarwa cia imuntû birîa binene.