Karon amo ini ang katapusan nga mga polong ni David: Si David nga anak ni Jesse nagasiling, ang lalaki nga ginbayaw sa kataasan nagasiling, ang ginhaplas sang Dios ni Jacob, ang mayuyum nga manugsalmo sang Israel:
Ang Dios sang Israel nagsiling, ang Igang sang Israel nagpamolong sa akon: Isa nga nagagahum sing matarung sa mga tawo nga nagagahum sa kahadluk sa Dios,
manginsubong sang kasanag sang kaagahon, subong sang nagasubang nga adlaw sa kaagahon nga walay gal-um, kon ang hilaw nga hilamon nagatubo sa duta sa masanag nga pagsilak sa tapus ang ulan.
Sa pagkamatuud, indi bala subong sini ang akon balay upud sa Dios? Kay sia naghimo upud sa akon sing katipan nga dayon, nagpahamtang sing nagakaigo sa tanan nga butang kag malig-on. Kay ini bug-os kong kaluwasan kag bug-os kong handum bisan ini wala niya pagapatuboa.
kondi nga ang tawo nga nagatandug sa ila dapat sangkapan sing salsalon kag sang olongan sang bangkaw, kag sonogon sila sing bug-os sa kalayo sa ila duug.”
Amo ini ang mga ngalan sang gamhanan nga mga tawo nga iya ni David: si Joseb-basevet nga Taquemonhon; sia puno sang mga pangolo; amo man si Adino nga Ezninhon, batok sa walo ka gatus nga pinatay sa isa ka tion.
Kag madason sa iya si Eleazar nga anak nga lalaki ni Doda, nga anak sang Ahohanon. Isa sia sang tatlo ka gamhanan nga mga tawo upud kay David sang pagsumpung nila sa mga Filistinhon nga nagtilipon sing tingub didto sa inaway, kag ang mga tawo sang Israel nagtaklad.
Sia nagtindug kag ginpanglabo niya ang mga Filistinhon tubtub nga kinapoy ang iya kamut, kag nagtapik sa espada ang iya kamut; kag ang Ginoo naghikot sing dakung pagluwas sadtong adlaw; kag nagbalik ang katawohan sa olihi niya lamang sa pagkuha sing inagaw.
Kag madason sa iya si Sama, lalaking anak ni Age nga Hararnon. Nagtilipon sing tingub ang mga Filistinhon sa isa ka kabon, diin may puna nga duta nga hil-ub sing mga lentijas; kag ang katawohan nagpalagyo gikan sa mga Filistinhon.
Kag ang tatlo sang katloan ka puno nga mga tawo nagdulhog, kag nagkadto kay David sang tig-alani sa lungib sang Adullam, sang nagpahamtang ang kabon sang mga Filistinhon sing dologan sa nalupyakan sang Refaim.
Kag naghandum si David kag nagsiling, “O kabay nga ang isa maghatag sa pagpainum sa akon sing tubig gikan sa bobon sang Bet-lehem nga yara sa luyo sang gawang!”
Niyan ang tatlo ka gamhanan nga mga lalaki nagbulwang sang kasoldadosan sang mga Filistinhon, kag nagsag-ob sing tubig sa bobon sang Bet-lehem nga yara sa luyo sang gawang, kag nagkuha sini kag nagdala sini kay David. Apang indi sia buut mag-inum sini; kondi gin-ula niya ini sa Ginoo,
kag nagsiling sia, “Malayo ini sa akon, O Ginoo, nga ako maghimo sini. Imnon ko bala ang dugo sang mga lalaki nga naglakat nga nagpakatalagman sang ila kabuhi?” Busa indi sia buut mag-inum sini. Ini nga mga butang ginhimo sang tatlo ka gamhanan nga mga lalaki.
Karon si Abisai, ang utud ni Joab, ang anak ni Sarvia, amo ang puno sang tatlo. Kag nagbayaw sia sang iya bangkaw batok sa tatlo ka gatus kag ginpatay sila, kag may kabantugan sa tunga sang tatlo.
Kag si Benaya nga anak ni Joiada nga anak sang isganan nga lalaki sang Cabzel, nakahimo sing gamhanan nga mga buhat; sia nagpatay sang duha ka lalaki nga anak ni Ariel sang Moab. Sia nagdulhog man kag ginpatay ang isa ka leon sa tunga sang awang sa panag-on sang nieve.
Kag ginpatay niya ang isa ka Egiptohanon, lalaki nga may tindug. Ang Egiptohanon may bangkaw sa iya kamut; apang nagdulhog sia sa iya nga may sungkud, kag gin-agaw sa kamut sang Egiptohanon ang bangkaw, kag ginpatay sia sang iya kaugalingon nga bangkaw.