Were agi apai re nga ga Dawidi yangara fugo: Dawidi wiri Yisai naya nga gu kumba i akiisi pa ko gbe, nga gu mbedimbedi boro nga ga gu Mbori nga ga Yakoba ko, nga gu bawene babibia tambuahe nga ga aYisaraere ko:
Ni rengo angbatungare wo fu Mbori, te? Ono ko mangi nyenye zungahe na mi, ni rugurugu he rogo apai dunduko, ni ndikidi he. A nga gi bata na gu pai dunduko mi akpi nyemu he, ka ko kiisi nga pa ha, te?
Gere nga rimo agu airanyaka nangia ga Dawidi yo: Yoseba-basebeta boro Takemona, ko adu ni barumbatayo fu agu yo 30; kina ko nga Adino boro Esene, ko aimi aboro 800 ni gako baso ni kina gu uru sa.
Fuo ko Erazara ki du nangia wiri Dodo, Dodo ki ngia wiri Awoa. Erazara naadu dagba agu airanyaka biata nadu na Dawidi, ho i apayasi pa aFereseto ni nga agu yo naadungura tiyo sa vura, akumba aYisaraere ki guari ku sa yo.
Ko tigako aguari, ki mangi aFereseto daho beko ambu ni, beko ki dika tihe kuti pene basape. Yekova afu bakere diabese fu yo ni gu uru re. Aboro ki karaga tiyo fuo ko ka gbu kina ahe.
Fuo ko Sama ki du nangia wiri Age boro Arara. AFereseto adungura tiyo ni rikavura ku Rei yo, yo dagba rago adu ni, abakpa arengbe na ni dũ. Aboro ki oro be aFereseto.
Abaakumba biata dagba agu abaakumba 30 ki zorõ ki ye koyo du Dawidi ni ti regbo ke ahe sa gu simbia nga Adurama. Gu rikavura nga ga aFereseto ki zi bataya rogo gu ngboongboorago du Refaima yo.
Si du agu airanyaka biata re ki gbiriwo rogo ga aFereseto rimbasa, ki gbe ime rogo guga Betereme, nga gu naadu pa ngbadimo bakporo, ki di he, ki ye na ni fu Dawidi. Ono ko akpi nga nyemu ka mbira ha te; ko ki uka ha fu kina Yekova.
Ko ki ya, “Ako Yekova, si arengba nga fere mi mangi gi pai te re. Mi mbiri kure agu aboro fu ungayo ku ngba pai yo?” Si du ko akpi nga nyemu ka mbira ha ti ni ya. Agi apai re agu airanyaka biata re amangi he.
Abisai unvurua Yoaba, nangia wiri Seruya, adu ni barumbatayo fu agu yo naadu biata. Ko ki di gako baso kuti aboro 300 ki imi yo, ko ki du na worimo dagba agu yo naadu biata.
Benaya wiri Yoyada adu ni eerẽ kumba nangia boro Kabasere, namangi baiiriwo apai, ko aimi agu airanyaka ue nga ga aMoabo yo. Boro ko andu a ki imi bahu due yo rago kere zere.
Ko ki imi boro Ezipeta, ni bawene kumba. Gu boro Ezipeta re adu na baso be ko ono Benaya ki ndu sa ko na kina ngbondo, ko ki gbe baso be boro Ezipeta, ki imi ko na kina gako baso.