Omiyo ruoth nowacho ni Joab gi jotend lweny mane ni kode niya, “Dhiuru koro, uwuoth e dhout Israel duto, chakre Dan nyaka Beer-sheba, kukwano ji, mondo ung’e kar rombgi.”
To kane Daudi osekwano ji, chunye nochande, mowacho ni Ruoth Nyasaye niya, “A Ruoth Nyasaye, aseketho ahinya kuom gima asetimo. To koro asayi ni mondo iwena richona, nikech asetimo gima ofuwo.”
To kane malaika orieyo bade kochiko Jerusalem mondo oketh dalano, Ruoth Nyasaye noloko parone kuom masira ma nodwaro timo mowacho ni malaika mane nego ji niya, “Oromo! Koro dwok lweti.” To noyudo ka malaika mar Ruoth Nyasaye obet but kar dino mar Arauna ja-Jebus.
Kane Daudi oneno malaika mane nego ji, nowacho ni Ruoth Nyasaye niya, “An e jakwath moseketho, kendo an ema asetimo gima rach. To ere rach ma ogandani osetimo? Akwayi ni an ema mondo ikuma kod dhoodwa.”
Arauna nopenjo ruoth niya, “Marang’o ibiro ira?” Daudi nodwoke ni, “Adwaro ng’iewo kodi kar dinoni, mondo agerie ni Ruoth Nyasaye kendo-mar-misango, mondo tho ma nego joga orum.”
To ruoth nodwoke ni, “Ooyo, nyaka achuli, nikech ok natim ni Ruoth Nyasaye ma Nyasacha misengni gi gik mayudo nono.” Omiyo Daudi nochulo fedha ma dirom nus kilo, kong’iewogo kar dino kaachiel gi ruedhigo.