Ha Abner ipochyeterei Isboset he’iva’ekue rehe, ha he’i: Chéiko Judayguakuéra rymba jagua mba’e. Che aipytyvõ ko árape nde ru Saul rógape, ipehẽnguekuéra ha iñangirũnguérape, ha noromoĩrikuri David pópe. Ha ndépa reitýta cheári ko kuña kóva angaipa.
Ñanderuete tachehavira, che Abner, naipytyvõi ramo ko ára guive Davídpe ha ajapopáta David rehehápe opaite mba’e Ñanderuete voi oprometeva’ekue guive he’ívo:
Aitýta Saul ha iñemoñarenguéra Israel retã ruvicha guapyhágui ha amboguapýta Davídpe Israel ha Juda retã ruvicha guapyhápe, ha’e oisãmbyhy hag̃ua Dan guive Beerséba peve.
Upémaramo Abner omondo ñe’ẽ rerahahára David rendápe, he’iukávo ichupe: Máva mba’épa ko tetã. Ha he’iveva’erã avei ichupe: Eiko chendive peteĩ ñe’ẽme, ha che po oĩta nendive opaite Israel tríbu opyta hag̃ua nde poguýpe.
Ko’ág̃a pejapo katu avei Ñanderuete he’imava’ekue: Che rembiguái David po rupi asalváta che retã Israel Filisteaygua poguýgui, ha mayma hese ija’e’ỹva pógui.
Abner oñe’ẽ avei Benjaminguakuérape; ha upéi ha’e voi oho Hebrónpe omombe’upa hag̃ua Davídpe Israelgua ha Benjamin rogayguakuéra opytaseha avei David poguýpe.
Ha Abner he’i Davídpe: Che apu’ãta ha aháta ambyaty hag̃ua che jára retã ruvichápe g̃uarã opaite Israelguakuérape, oiko hag̃ua hikuái nendive peteĩ ñe’ẽme ha nde reiko hag̃ua hetã ruvichaguasu ramo ha reisãmyhy hag̃ua nde py’apy oñandu háicha. Upéi David omondo Abnérpe, ha ha’e oho py’aguapýpe.
To’a Joab akã, ha mayma itúva rogayguakuéra ári, ha opaite ára Joab rogayguakuéra apytépe toĩ mba’asy, tuguy syry, ai ñarõ (lépra), heta toguata yvyra po’i rehe, tomano kyse pukúpe ha ñembyahýigui.
Upémaramo David he’i Joábpe ha mayma tetãygua hendive oĩvape: Pemondoro pende aokuéra, ha pemonde ao hũ ha peñemomba’embyasy Abner omano haguére. Ha pe tetã ruvicha David oho Abner re’õngue oĩháme (oñotỹ hag̃ua).
Upéramo mayma tetãyguakuéra ou David rendápe ha he’i ichupe okaru hag̃ua, ohasa mboyve pe ára. David katu ome’ẽ iñe’ẽ he’ívo ichupekuéra: Ñanderuete tachehavira ha tombojo’ave avei, che ha’u ramo pan térã oimeraẽ mba’e oike mboyve pe kuarahy.