A Sol kamba zakẽ, nin-daad la bi-bees a yiibu n da be be. A ye yʋʋr a Baana, a yiib soaba a Rekab. B ra ya Beerot rao a Rimõ kamba, a Bẽnzame roogẽ, tɩ bala b geta Beerot me wala a Bẽnzame soolem.
A Sol biig a Zonatã da tara a biig a yembre, la a karsa ra fabame. A ra tara yʋʋm a nu, a Sol ne a Zonatã kʋʋra sẽn yɩ Zizreyɛl n wa, a ma wubdga põk-a lame n na n zoe, la zoeesa sẽn yɩ ne yãgb bala, biiga fʋrg n lʋɩɩme t'a kars sãame.
Beerot rao, a Rimõ, kamb a yiibã, a Rekab ne a Baana, waa n yika wĩnto-sʋka n kẽng a Isbaal yiri wa b na n tɩ sika koodo. B kẽeme n mik t'a kẽe vʋʋsgo.
B talla a Isbaal zugã n wa a Daviid taoore, Ebrõ, la b yeela dĩma: «Ad-a Sol biiga a Isbaal zugu, yãmb bɛyã sẽn da rat y yõore. Soaala-Wẽnd saka rũnna tɩ d soaala la d dĩma paam n dok a sũur ne a Sol la a buudu.»
La a Daviid goma ne Beerot Rimõ kambã, a Rekab ne a yao a Baana, n yeel-ba: «Bas-y tɩ m wẽen ne Wẽnd sẽn vɩ la sẽn yiisd maam toog buud fãa pʋgẽ wã la m yeel-y woto:
A Daviid kõ-la a neba noor tɩ b kʋ-ba. B kʋʋsa b nus la b nao n lul-b Ebrõ ko-baoora sɛɛga. La b rɩka a Isbaal zugã, n tɩ mum a Abnɛr yaoogẽ, Ebrõ tẽnga.