Sindoqa Xwedê, ji mala Avînadavê li ser gir hildan û danîn ser erebeyeke nû. Herdu kurên Avînadav, Ûzza û Ahyo erebeya nû ya ku Sindoqa Xwedê li ser bû, diajotin. Ahyo li pêşiya Sindoqê dimeşiya.
Ji Dawidê Padîşah re hat gotin: “Xudan ji ber Sindoqa Xwedê Ovêd-Edom, hemû malbata wî û her tiştê wî pîroz kir.” Bi vî awayî Dawid çû û Sindoqa Xwedê ji mala Ovêd-Edom bi kêfxweşî anî Bajarê Dawid.
Gava Sindoqa Xudan hat Bajarê Dawid, Mîkala keça Şawûl di pencereyê re nêrî. Dema wê dît Dawidê Padîşah li hizûra Xudan direqise û lotikan davêje, Mîkalê di dilê xwe de ew kêm dît.
Gava Dawid ji bo pîrozkirina malbata xwe vegeriya, Mîkala keça Şawûl derket derve ku pêşwaziya wî bike. Ji Dawid re got: “Padîşahê gelê Îsraêl îro çi navekî xweş bi pey xwe xist! Mîna kesekî bêqîmet, te xwe li ber cariyeyên xulamên xwe tazî kir.”
Dawid got: “Ez li ber Xudan reqisîm. Çimkî wî ez li cihê bavê te û hemû ziriyeta wî hilbijartim û wekî serwer li ser gelê xwe Îsraêl şandim! Helbet ezê li ber Xudan bireqisim!