A Davɩɩd ne neb nins sẽn dag n be ne yẽnda wã yii Baall-Zʋʋda n na n kẽng n tɩ rɩk Wẽnnaam kaoolã koglgã n wa. Yaa kogl-kãng taoore, la b boond Saasẽ-Pãng-Soabã sẽn zĩ Serubẽ dãmbã sʋkã yʋʋre.
Bãmb kẽnga a Abinadaab zakã sẽn be tãngã zugã, n tɩ yiis kaoolã koglgã n dogl sarɛt-paalg pʋgẽ. A Abinadaab kambã, a Uuza ne a Akiyo n dag n get sarɛt-paalgã yell t'a kẽnda.
A Davɩɩd pɛlengã yɩka wʋsgo, Sẽn-Ka-Saab sẽn sɩbg a Uuza ne sɩbgr a woto wã yĩnga. B pʋda zĩ-kãng yʋʋr tɩ Perets-Uuza, sẽn dat n togs t'a ‹Uuza sɩbgr zĩiga›, la zĩigã yʋʋr ket n yaa woto hal tɩ ta rũndã.
B tɩ togsa dĩm a Davɩɩd tɩ Sẽn-Ka-Saab ninga a Obɛɛd-Edom yirã rãmba, ne yẽnda sẽn so bũmb ninsã fãa barka, Wẽnnaam kaoolã koglgã yĩnga. Dẽ, a Davɩɩd yikame n kẽng n tɩ tall Wẽnnaam kaoolã koglgã sẽn be a Obɛɛd-Edom zakẽ wã, n wa a Davɩɩd tẽngã pʋgẽ ne sũ-no-kãsenga.
Sẽn-Ka-Saab kaoolã koglgã sẽn wa n kẽed a Davɩɩd tẽngã pʋgẽ wã, a Sayull bi-pugl a Mikall dag n bee roog peem-lɛɛgẽ n lɩk n getẽ. A Mikall yãame tɩ rĩm a Davɩɩd yɩgd n kɩdemdẽ, la a saood Sẽn-Ka-Saab taoore, la a paooga a Davɩɩd a sũurẽ.
B sẽn tall Sẽn-Ka-Saab kaoolã koglgã n wa wã zugẽ, b ning-a-la fu-roog ning a Davɩɩd sẽn dag n segl a yĩnga pʋgẽ. A Davɩɩd maana maand sẽn yõogd bugum, ne zems-n-taar maand Sẽn-Ka-Saab taoore.
La dĩm a Davɩɩd kɩtame tɩ b pʋɩ Israyɛll nin-buiidã fãa rɩɩbo, b raopa ne b pagba, la ned kam fãa paama bur-yend ne nem-sẽedgo, la sibi. La ned fãa lebg n kuila a yiri.
A Davɩɩd lebg n kuilame n na n tɩ ning a yirã rãmb barka. La a Sayull bi-pugl a Mikall yiime n seg a Davɩɩd n yeel-a yaa: «Israyɛll dĩmã paama ziir rũndã. Bala, bãmb yeesa b fut b tʋmtʋmdbã ne yem-pogsã taoore, n maan b meng wa nin-yaalga.»
A Davɩɩd leok-a lame yaa: «Yaa Sẽn-Ka-Saab taoor la mam maan bõn-kãngã. Bãmb basa fo ba wã ne f buudã fãa, la b yãk maam tɩ m yɩ Israyɛll nebã rĩmã. Dẽ, yaa Sẽn-Ka-Saab-kãng taoor la mam sao yã.
Mam nongẽ lame tɩ b yaal maam n yɩɩd a woto, la m sik m meng n paase. La baoosgo, mam na n kell n paama waoogre, yem-pogs nins fo sẽn gomd-b yellã taoore.»